🔴প্ৰমোদ বড়োৰ নেতৃত্বত ইউপিপিএল চৰকাৰ ক্ষমতালৈ অহাৰ পিছত বিটিআৰত শান্তি-সম্প্ৰীতি ঘূৰি আহিছে : প্ৰতিভা ব্ৰহ্ম
নিয়মীয়া বাৰ্তা, ২১ নৱেম্বৰ : বিটিচিৰ ৩২নং ভেৰগাঁও পৰিষদীয় সমষ্টিৰ অন্তৰ্গত খাগ্ৰাবাৰীত আজি ‘১০০ মহিলাৰে মত বিনিময়’ শীৰ্ষক এক কাৰ্যসূচী অনুষ্ঠিত হয়। পৰিষদীয় সমষ্টিটোৰ প্ৰতিটো প্ৰাইমাৰী কমিটিৰ ১০০গৰাকী মহিলাৰ সৈতে মত বিনিময় কৰাৰ উদ্দেশ্যে ইউ পি পি এলৰ মহিলা কোষৰ ভেৰগাঁও ব্লক কমিটিৰ উদ্যোগত খাগ্ৰাবাৰী বজাৰ প্ৰাংগণত অনুষ্ঠিত হয় এই অনুষ্ঠান। অনুষ্ঠানত মুখ্য অতিথি ৰূপে অংশ গ্ৰহণ কৰি মহিলা কোষৰ কেন্দ্ৰীয় সভানেত্ৰী প্ৰতিভা ব্ৰহ্মই ১৭ বছৰীয়া শাসন কালত মহিলাৰ আঁচনি ৰূপায়নত হাগ্ৰামা মহিলাৰী নেতৃত্বাধীন বিপিএফ চৰকাৰখন সম্পূৰ্ণ ৰূপে ব্যৰ্থ হোৱা বুলি মন্তব্য কৰি কয় যে প্ৰমোদ বড়ো নেতৃত্বাধীন ইউ পি পি এল চৰকাৰে সদায়ে মহিলাসকলক অগ্ৰাধিকাৰ দি মহিলা সবলীকৰণ, উন্নয়নৰ বাবে কাম কৰি আহিছে। প্ৰমোদ বড়োৰ চৰকাৰ খনে ‘মাইনাও স্বৌৰাং বিথাংখী’ আঁচনিৰ জৰিয়তে মহিলা সকলক অৰ্থনৈতিকভাৱে সবল কৰাত এক উল্লেখযোগ্য পদক্ষেপ গ্ৰহণ কৰা বুলি উল্লেখ কৰি তেওঁ লগতে কয় যে বিজেপি আৰু ইউ পি পি এল মিত্ৰজোঁটৰ চৰকাৰখনেও ‘অৰুণোদয়’ আঁচনিৰ যোগেদি মহিলাসকলক আৰ্থিক দিশত সবল কৰাত উল্লেখনীয় ভূমিকা গ্ৰহণ কৰিছে। প্ৰমোদ বড়োৰ নেতৃত্বত ইউ পি পি এল দল ক্ষমতালৈ অহাৰ পিছত বিটিআৰত শান্তি-সম্প্ৰীতি ঘূৰি অহা বুলি দাবী কৰি মহিলা কোষৰ কেন্দ্ৰীয় নেত্ৰীগৰাকীয়ে আৰু কয়- পূৰ্বৰ চৰকাৰৰ দিনত বিটিচি এলেকাত গণতন্ত্ৰ বুলিবলৈ একোৱেই নাছিল। মহিলাসকলেও উচিত মৰ্যাদা লাভ কৰা নাছিল। কিন্তু আমাৰ চৰকাৰে মহিলাসকলক সদায় উচিত সন্মান দি আহিছে। বিটিআৰৰ ৪০টা পৰিষদীয় সমষ্টিত ৪০খনকৈ কেৱল মহিলাৰ দ্বাৰা পৰিচালিত বজাৰ নিৰ্মাণৰ বাবে ইউ পি পি এল চৰকাৰখনে পৰিকল্পনা হাতত লোৱা বুলিও তেওঁ উল্লেখ কৰে। সামাজিক-ৰাজনৈতিকভাৱে মহিলাসকলক সজাগ-সচেতন কৰাৰ উদ্দেশ্যে আয়োজন কৰা এই অনুষ্ঠানত অংশ লৈ বিটিচিৰ কাৰ্যবাহী সদস্য দাউবৈছা বড়োৱে প্ৰমোদ বড়ো নেতৃত্বাধীন চৰকাৰখনে কৰি অহা কাম-কাজত ৰাইজ সন্তুষ্ট হোৱা বুলি মন্তব্য কৰে। ভেৰগাঁও জিলা ইউ পি পি এলৰ সভাপতি নিৰ্মল বড়োৱে আদৰণী ভাষণ প্ৰদান কৰা এই অনুষ্ঠানত পৰিষদীয় সমষ্টিটোৰ ১৪টা প্ৰাইমাৰী কমিটিৰ দুই সহস্ৰাধিক মহিলাই অংশ গ্ৰহণ কৰে। ইউ পি পি এলৰ ভেৰগাঁও ব্লক কমিটিৰ সভানেত্ৰী লভিতা কছাৰীৰ সঞ্চালনাত অনুষ্ঠিত মত বিনিময় অনুষ্ঠানত দলটোৰ মহিলা কোষৰ কেন্দ্ৰীয় উপ সভানেত্ৰী মাৰিয়াম তপ্ন, কেন্দ্ৰীয় সম্পাদিকা (সাংগঠনিক) মুৰ্ছিদা বেগম, ইউ পি পি এলৰ কেন্দ্ৰীয় সাংগঠনিক সাধাৰণ সম্পাদক ৰুদ্ৰ বাহাদুৰ ছেত্ৰী, ভেৰগাঁও জিলা ইউ পি পি এলৰ প্ৰশাসনিক সম্পাদক এন্থনী বসুমতাৰী প্ৰমুখ্যে ভালেসংখ্যক দলীয় নেতা-কৰ্মী উপস্থিত থাকে।
প্ৰেৰক ধীৰেন মহলীয়া