বিশেষ বাৰ্তা, ৩ ফেব্ৰুৱাৰী : ৰাজ্যৰ মুখ্যমন্ত্ৰী, জননেতা ড° হিমন্ত বিশ্ব শৰ্মাৰ জন্মদিনৰ সৈতে সংগতি ৰাখি মৰিয়নিৰ হিমন্ত বিশ্ব শৰ্মা ফেনছ ক্লাবে আজি একাধিক কাৰ্য্যসূচী ৰূপায়ণ কৰে । এই উপলক্ষে মৰিয়নিৰ দৈনিক বজাৰ পূজা মন্দিৰ প্ৰাংগণত এক অনুষ্ঠান অনুষ্ঠিত কৰে । আৰম্ভণিতে মৰিয়নিৰ বিধায়ক ৰূপজ্যোতি কুৰ্মীয়ে হিমন্ত বিশ্ব শৰ্মাৰ নামত কেক কাটি অনুষ্ঠানৰ শুভাৰম্ভ কৰে। মৰিয়নিৰ হিমন্ত বিশ্ব শৰ্মা ফেনছ ক্লাবৰ সভাপতি দ্বীপেন চেতিয়াই আদৰণী ভাষণ প্ৰদান কৰা অনুষ্ঠানটোত বিধায়ক ৰূপজ্যোতি কুৰ্মীৰ লগতে মৰিয়নি পৌৰসভাৰ পৌৰপতি বিশ্বপ্ৰভা শইকীয়া, মৰিয়নি মণ্ডল বিজেপিৰ সভাপতি উমেশ তাছা আদিয়ে বক্তব্য প্ৰদান কৰি হিমন্ত বিশ্ব শৰ্মা ফেনছ ক্লাবে দুখীয়া-দৰিদ্ৰ ৰাইজৰ সুবিধাৰ্থে কৰি অহা সামাজিক কাম-কাজৰ শলাগ লয় । আনহাতে, ড° হিমন্ত বিশ্ব শৰ্মা নেতৃত্বাধীন অসম চৰকাৰে ৰাইজৰ বাবে কৰা কাম-কাজে ৰাজ্যখনৰ জনসাধাৰণৰ উপকাৰ সাধন কৰা বুলিও তেওঁলোকে বক্তব্যৰ মাজত উল্লেখ কৰে । পীয়ূষ শৰ্মাই আঁত ধৰা অনুষ্ঠানটোত মৰিয়নি পৌৰসভাৰ উপ-পৌৰপতি প্ৰদীপ দাস, পৌৰ সদস্যত্ৰয় কস্তুৰী আগৰৱালা গগৈ, চুমকি মজুমদাৰ দত্ত, গায়ত্ৰী চক্ৰৱৰ্তী, বিশিষ্ট ব্যৱসায়ী কাৰ্তিক কৰ্মকাৰ, সমাজকৰ্মী কৃষ্ণগোপাল দেৱৰ লগতে উত্তম ধৰ, জিয়াউৰ ৰহমান, বিবেক দত্ত, ৰঞ্জিত সৰকাৰ, কাৰ্তিক সৰকাৰ, অমিত ধৰ, দিগন্ত শ্যাম, কৃষ্ণ ভূমিজ আদি উপস্থিত থাকে । এই অনুষ্ঠানতে হিমন্ত বিশ্ব শৰ্মা ফেনছ ক্লাবৰ তৰফৰ পৰা মৰিয়নিৰ এহেজাৰৰো অধিক দুখীয়া লোকৰ মাজত গৰম বস্ত্ৰ আদি প্ৰদান কৰা হয় ।
প্ৰেৰক দিব্যজ্যোতি শইকীয়া