নিয়মীয়া বাৰ্তা ২৯ অক্টোবৰঃ ৰাজ্যখনত পেট্র’লৰ দামে শতকৰ ঘৰ পাৰ কৰাৰ সমান্তৰালভাৱে ডিজেলৰ দামো শতকৰ ঘৰ স্পর্শ কৰিছে৷ ৰন্ধন গেছৰ দাম বৃদ্ধিয়েও ৰাইজক জুৰুলা কৰিছে৷ একে সময়তে শাক–পাচলিৰ পৰা আৰম্ভ কৰি মাছ–মাংস–দাইল–মিঠ্ দামে ৰাইজক জলাকলা খুৱাইছে৷ সমান্তৰালভাৱে ৰড, চিমেণ্টকে ধৰি নির্মাণ সামগ্রীৰ আকাশলংঘী মূল্যবৃদ্ধিয়ে জনসাধাৰণৰ মূৰত ৰাম–টাঙোন শোধাইছে৷ মানুহৰ উপার্জন হ্রাস পোৱাৰ সময়তে প্রতিটো সামগ্রীৰ আকাশলংঘী মূল্যবৃদ্ধিয়ে জনসাধাৰণক ত্রস্তমান কৰি তুলিছে৷ সেই সময়তে ৰাজ্যবাসীলৈ আশাৰ খবৰ কঢ়িয়াই আনিছে মুখ্যমন্ত্রী ড০ হিমন্ত বিশ্ব শর্মাই৷ অহা ১০–১৫ দিনৰ ভিতৰত মূল্যবৃদ্ধি সম্পর্কীয় পৰিস্থিতি স্বাভাৱিক হোৱাৰ আশা কৰিছে মুখ্যমন্ত্রী ড০ শর্মাই৷
বৃহস্পতিবাৰে গুৱাহাটীত সংবাদ মাধ্যমৰ আগত মুখ্যমন্ত্রী ড০ শর্মাই কয় যে মূল্যবৃদ্ধিৰ বোজা এটা ৰাইজৰ মূৰত আছে৷ মই ভাবোঁ আৰু কেইটামান দিনৰ ভিতৰত পৰিৱেশ স্বাভাৱিক হৈ যাব৷ ইমানদিনে অর্থনীতি খুব বেয়া হৈ আছিল৷ এতিয়া ঘৰত জমা হৈ থকা বস্তু বিক্রী কৰিব ওলাইছে৷ যোৱা তিনি মাহৰ ক্ষতি পূৰণ কৰিব খুজিছে৷ এইটো এটা পর্যায়৷ অহা ১০–১৫ দিনৰ ভিতৰত এই পর্যায় অতিক্রম কৰিব পৰা যাব বুলি মুখ্যমন্ত্রী ড০ শর্মাই আশা প্রকাশ কৰে৷