নিয়মীয়া বাৰ্তা, ৮ মাৰ্চ : আন্তৰ্জাতিক নাৰী দিৱসৰ লগত সংগতি ৰাখি আজি গোলাঘাটত সমাজ কল্যাণ বিভাগ আৰু পঞ্চায়ত আৰু গ্ৰামোন্নয়ন বিভাগৰ যৌথ উদ্যোগত জিলাখনৰ উত্তৰ গোলাঘাট, কেন্দ্ৰীয় গোলাঘাট, গমাৰীগুৰি, মৰঙি দক্ষিণ গোলাঘাট, কাকডোঙা ,পূব গোলাঘাট আৰু পশ্চিম গোলাঘাট সংহত উন্নয়ন প্ৰকল্পত বিশেষ গ্ৰামসভা অনুষ্ঠিত হৈ যায় । ‘এক সুস্থিৰ ভৱিষ্যতৰ বাবে আজিয়েই লিংগ সমানতা নিশ্চিতকৰণ’ বিষয়বস্তু হিচাপে লোৱা আজিৰ অনুষ্ঠানত সকলো ক্ষেত্ৰতে নাৰীক সমমৰ্যাদা , সুযোগ সুবিধা তথা উপযুক্ত সন্মান প্ৰদানৰ ওপৰত আলোকপাত কৰা হয়। জিলা সমাজ কল্যাণ বিভাগ ভাৰপ্ৰাপ্ত বিষয়া গৌৰী প্ৰিয়া দেউৰীৰ নিৰীক্ষণত সংহত উন্নয়ন প্ৰকল্পৰ শিশু উন্নয়ন বিষয়াসকল আৰু পঞ্চায়ত কাৰ্যালয় সমূহৰ সহযোগিতাত এই দিৱস সফলতাৰে অনুষ্ঠিত হয়। সভাকেইখনত উপস্থিত সকলোৱে নাৰী আৰু শিশুৰ বিভিন্ন দিশৰ ওপৰত প্ৰতিজ্ঞাবদ্ধ হোৱাৰ সংকল্প গ্ৰহণ কৰে।এই কাৰ্যসূচী সমূহত সংশ্লিষ্ট উন্নয়ন খণ্ডৰ খণ্ড উন্নয়ন বিষয়াসকলৰ লগতে সমাজৰ কল্যাণ বিভাগৰ বিভিন্ন পৰ্যায়ৰ বিষয়া কৰ্মচাৰী, পঞ্চায়তৰ সভাপতিসকলৰ লগতে বিভিন্ন বিভাগৰ বিষয়া কৰ্মচাৰীসকল উপস্হিত থাকে। আনহাতে আন্তৰ্জাতিক নাৰী দিৱসৰ লগত সংগতি ৰাখি গোলাঘাটৰ স্বেচ্ছাসেৱী অনুষ্ঠান OSDR উদ্যোগত আৰু যোগিবাৰী গ্ৰাম্য মহিলা সংগঠনৰ সহযোগত এটি বিনামূলীয়া চিকিৎসা শিবিৰ অনুষ্ঠিত কৰে। এই কাৰ্যসূচীত সমল ব্যক্তি হিচাবে খুমটাইৰ বিধায়ক মৃণাল শইকীয়াই নাৰী দিৱসৰ তাৎপৰ্য সম্পৰ্কে ব্যাখ্যা আগবঢ়ায় । ইয়াৰ লগতে বিধায়ক গৰাকীয়ে নিজা গাঁওখনৰ বৃদ্ধাসকলৰ লগত মত বিনিময় কৰে।
প্ৰেৰক ভৰত দত্ত