নিয়মীয়া বাৰ্তা, ৩০ মেঃ বঙাইগাঁও জিলাৰ যোগীঘোপা থানাৰ অন্তৰ্গত খেৰপুজিত যোৱানিশা এক বিধ্বংসী অগ্নিকাণ্ডৰ ঘটনা সংঘটিত হয় । অগ্নিকাণ্ডত তিনিটা বাসগৃহ সম্পূৰ্ণৰূপে ভস্মীভূত হয় । জানিব পৰা মতে, খেৰপুজি গাঁৱৰ ইউচুফ আলীৰ গোহালী এটাত কালি নিশা প্ৰায় ১০,৩০ বজাত অগ্নিকাণ্ডৰ সুত্ৰপাত হয় । এই জুয়ে নিমিষিতে কাষতে থকা জোচমত আলীৰ বাসগৃহলৈ জুই বিয়পি পৰে।এই জুইৰ লিলিহান শিখা ইমানে ভয়াৱহ আছিল যে মুহুৰ্তৰ ভিতৰত জোচমত আলীৰ তিনিটাকৈ বাসগৃহ একেলগে জ্বলি উঠে।লগে লগে স্থানীয় লোক সকলৰ মাজত হুৱা-দুৱা লাগে । স্থানীয় লোকে জুই নুমুৱাবলৈ অশেষ চেষ্টা কৰে যদিও দাউ দাউকৈ জ্বলি উঠা জুইত জোচমত আলীৰ তিনিটা বাসগৃহ সম্পূৰ্ণৰূপে জ্বলি ছাই হয় ।খবৰ পোৱা মাত্ৰে ঘটনাস্থলীত যোগীঘোপা আৰক্ষী আৰু অগ্নিনিৰ্ব্বাপক বাহিনীৰ দুখন বাহন উপস্থিত হৈ স্থানীয় ৰাইজৰ সহযোগত জুই নিৰ্বাপণ কৰিবলৈ সক্ষম হয় । অগ্নিকাণ্ডত প্ৰয়োজনীয় নথি-পত্ৰ ,আচবাবৰ লগতে প্ৰায় ১০ লক্ষাধিক টকাৰ ক্ষতি হয় বুলি জনা গৈছে ।
প্ৰেৰক টিংকু চন্দ্ৰ দাস