নিয়মীয়া বাৰ্তা, ১২ মে’ : দুটা মাহৰ এক দীঘলীয়া বিৰতি । স্বগৃহলৈ উভতি আহিল অসমবাসীৰ হিয়াৰ আমঠু জুবিন গাৰ্গ । মঙলবাাৰে পুৱতি নিশা প্ৰায় ২.৩০ মিনিটত পত্নী আৰু দুগৰাকী সতীৰ্থৰ সৈতে সৰুসজাইত উপস্থিত হয়হি জুবিন গাৰ্গ । ইয়াৰ পিছতে হোটেল ৰেডিছন ব্লু’ত কোৱাৰেণ্টাইনত ৰখা হৈছে জুবিন গাৰ্গসহ আটাইকে।
৮ মে’ ত মুম্বাইৰ পৰা অসমলৈ যাত্ৰা কৰা শিল্পীগৰাকীয়ে এখন শ্লিপাৰ বাছেৰে আহি আজি অসম পায়হি । এই খবৰে স্বাভাৱিকতেই উৎফুল্লিত কৰিছে জুবিন অনুৰাগীক ।
ইতিমধ্যে পত্নী গৰিমা শইকীয়া গাৰ্গে স্বভূমিত উপস্থিত হৈ ছ’চিয়েল মিডিয়াত কেইখনমান আলোকচিত্ৰ প্ৰকাশ কৰিছে ।
উল্লেখ্য যে উন্নত চিকিৎসা আৰু কিছুদিনৰ জিৰণী লোৱাৰ বাবে যোৱা ৮ মাৰ্চতে পত্নীৰ সৈতে মুম্বাইলৈ উৰা মাৰিছিল জুবিন গাৰ্গ ।