বন্ধন বেংকৰ বিত্তীয় সাফল্য অব্যাহত

নিয়মীয়া বাৰ্তা, ১৮ এপ্রিলঃ সদ্যসমাপ্ত বিত্তীয় বর্ষৰ আমানত ৩২ শতাংশলৈ বৃদ্ধি হৈছে ৷ বেংকটোৰ মুঠ আমানত ধন হৈছে ৫৭,০৭৩ কোটি টকা ৷ ১৩ এপ্রিলত বন্ধন বেংকৰ তৰফৰ পৰা জনোৱা হৈছে যে চলিত লকডাউনৰ বাবে তেওঁলোকৰ কোনো প্রভাৱ পৰা নাই, বৰঞ্চ মাইক্র’বেংকিং আমানত স্থিতিশীল আৰু মজবুত হৈয়ে আছে ৷ বেংক কর্তৃপক্ষই প্রকাশ কৰা মতে চলিত বর্ষৰ ১ জানুৱাৰীৰ পৰা ২১ মার্চপর্যন্ত দেশজুৰি তেওঁলোকৰ মাইক্র’বেংকিং ব্যৱসায়ত আমানত সংগ্রহ প্রায় ৯৮.৭ শতাংশ৷ মুঠ আমানতৰ ৭৮.৪ শতাংশই হৈছে ৰিটেইল ডিপ’জিট ৷ বিগত বিত্তীয় বর্ষত ই ৩৪ শতাংশ বৃদ্ধি পাইছে আৰু ৩১ মার্চ, ২০২০ত ইয়াৰ পৰিমাণ হৈছে ৪৪,৭৬০ কোটি টকা ৷ তদুপৰি বিগত বিত্তীয় বছৰৰ শেষত বন্ধন বেংকৰ মুঠ আমানত ধনৰ পৰিমাণ আছিল ৪৩,২৩২ কোটি টকা ৷ এইখিনি সময়তে বেংকৰ ৰিটেইল ডিপ’জিটৰ পৰিমাণ আছিল ৩৩,৪৪৫ কোটি টকা ৷ বন্ধন বেংকৰ দেয় ঋণ আৰু অগ্রিম ধনৰ পৰিমাণ বিগত বিত্তীয় বর্ষত অতি কম সময়ৰ ভিতৰত বহু বাঢ়ি গৈছে৷ হিচাপ মতে, ২০১৯–২০ বিত্তীয় বর্ষত ঋণ আৰু অগ্রিম ৬০ শতাংশ বাঢ়ি হৈছে ৭১,৮২৫ কোটি টকা৷ ২০১৮–১৯ বিত্তীয় বর্ষৰ শেষত ইয়াৰ পৰিমাণ আছিল ৪৪,৭৭৬ কোটি টকা৷ যোৱা ৩১ মার্চপর্যন্ত হিচাপ অনুযায়ী বেংকৰ ওচৰত অতিৰিক্ত নগদ যোগান (এক্সেছ লিকুইডিটী) হৈছেগৈ ৮,৪০২ কোটি টকা৷ তদুপৰি বেংকটোৰ ব্যৱসায় এতিয়া যিটো পর্যায়ত আছে তাতে এম এছ এফৰ অধীনত আৰু ১,৮১৫ কোটি টকা বন্ধনে তুলিব পাৰিব ৷