মহানগৰ বার্তা, ২৩ ডিচেম্বৰঃ মহানগৰীৰ ঠাকুৰকুছিত ৰে’ল ষ্টেচনৰ সমীপত ৰে’ল আলিৰ বিদ্যুতৰ কাম কৰি থকা অৱস্থাত ডেম’ ৰে’লৰ চেপাত এজন শ্রমিকৰ মৃত্যু হয়৷ মৃত শ্রমিকজন পশ্চিমবংগৰ বর্ধমান জিলাৰ মিমাৰী থানাৰ অন্তর্গত কটনা গাঁৱৰ জয়দেৱ দত্ত আৰু তেওঁ আৰ এফ আই পি এল প্রাইভেট লিমিটেডত কর্মৰত আছিল৷
আৰক্ষী সূত্রে জানিব পৰা মতে দেওবাৰে পুৱাৰ ভাগত তেওঁ আন কেইবাজনো শ্রমিকৰ সহযোগত ঠাকুৰকুছিত ৰে’ল আলিত বিদ্যুতৰ কাম কৰি আছিল৷ শ্রমিকজনে কাম কৰি থকা সময়ছোৱাতে উজনিমুৱা ‘ডেম’ ট্রেইন’ এখনৰ খুন্দাত বাগৰি পৰি শ্রমিকজন গুৰুতৰভাৱে আহত হয়৷ এই দুর্ঘটনা সংঘটিত হোৱাৰ পিছতেই প্রত্যক্ষদর্শী আৰভিয়া চন্দ্রই আৰক্ষীক খবৰ দিয়ে৷
পিছত নিউ গুৱাহাটী ষ্টেচনৰ চৰকাৰী ৰে’ল আৰক্ষীয়ে ঘটনাস্থলীত উপস্থিত হৈ আহত শ্রমিকজনক হাস্পতাললৈ প্রেৰণ কৰে যদিও চিকিৎসকে তেওঁক মৃত্যু হোৱা বুলি ঘোষণা কৰে৷
আৰক্ষীয়ে মৃতদেহটো পিছত জি এম চি এইচৰ পৰা মৰণোত্তৰ পৰীক্ষা সম্পন্ন কৰি পৰিয়ালৰ লোকক গতাই দিয়ে৷ ঘটনা সন্দর্ভত আৰক্ষীয়ে এটা গোচৰ ৰুজু কৰি তদন্ত অব্যাহত ৰাখিছে৷
অৱশ্যে ৰে’লখন আহি থকা প্রত্যক্ষ কৰি সহকর্মীসকলে তেওঁক অৱগত কৰোৱাৰ লগতে ৰে’লআলিৰ পৰা আঁতৰি আহিবলৈ কয় যদিও তেওঁ আঁতৰি অহা নাছিল বুলি আৰক্ষী সূত্রে জানিব পৰা গৈছে৷