নিয়মীয়া বার্তা, ১১ ফেব্রুৱাৰীঃ নুনমাটি থানাৰ অন্তর্গত নুনমাটি বিদ্যামন্দিৰ আৰু নুনমাটি পাব্লিক স্কুলৰ দুজন ছাত্র একেলগে সন্ধানহীন হোৱা ঘটনাই নুনমাটি অঞ্চলত তীব্র চাঞ্চল্যৰ সৃষ্টি কৰিছে৷ জানিব পৰা মতে, নুনমাটি বিদ্যামন্দিৰৰ পৰা এইবেলি হাইস্কুল শিক্ষান্ত পৰীক্ষাত অৱতীর্ণ হোৱা বিশাল শর্মা আৰু নুনমাটি পাব্লিক স্কুলৰ নৱম শ্রেণীৰ ছাত্র দীপাংকৰ হাজৰিকা ৰহস্যজনকভাৱে কালিৰ পৰা সন্ধানহীন হৈ আছে৷ পৰিয়ালৰ লোকৰ পৰা জানিব পৰা মতে, শালবাৰীৰ বাসিন্দা দুই ছাত্রই কালি একেলগে পূজা কৰাৰ উদ্দেশ্যে ঘৰৰ পৰা ওলাই গৈছিল আৰু তেতিয়াৰ পৰাই ৰহস্যজনকভাৱে সন্ধানহীন হৈ আছে দুয়োজন ছাত্র৷ ঘটনা সন্দর্ভত ছাত্র দুজনৰ পৰিয়ালৰ লোকে নুনমাটি থানাত এজাহাৰ দাখিল কৰিছে৷ আৰক্ষীয়ে এজাহাৰৰ ভিত্তিত এটা গোচৰ ৰুজু কৰি ছাত্র দুজনৰ সন্ধানত তদন্ত প্রক্রিয়া আৰম্ভ কৰিছে৷ হাইস্কুল শিক্ষান্ত পৰীক্ষাৰ আগদিনা এনেদৰে পৰীক্ষাত অৱতীর্ণ হ’ব লগা এজন ছাত্র নিৰুদ্দেশ হোৱা ঘটনাই গভীৰ শোকৰ ছাঁ পেলাইছে ছাত্রজনৰ বাসগৃহত৷