নিয়মীয়া বাৰ্তা ২৮ ফেব্ৰুৱাৰীঃ গুৱাহাটী মহানগৰীৰ বিভিন্ন স্থানত নিজকে চি আই ডি বিষয়া বুলি পৰিচয় দি ধন দাবী কৰি অহা এজন লোকক বৃহস্পতিবাৰে ৰাইজে উত্তম–মধ্যম শোধাই আৰক্ষীক গতাই দিয়ে৷ আৰক্ষীয়ে জানিবলৈ দিয়া মতে, শিৱসাগৰৰ সোণাৰিৰ পৰা গুৱাহাটীত পাছপ’ট উলিয়াবলৈ অহা সুব্রত ভূষণ দেৱ নামৰ লোকজনক নিজকে চি আই ডিৰ বিষয়া বুলি পৰিচয় দি বিৰাজ দাস নামৰ ভুৱা চি আই ডি বিষয়াজনে ২০ হাজাৰ টকা লুট কৰে৷ ভুক্তভোগী সুব্রত ভূষণ দেৱে চিঞৰ–বাখৰ কৰাত স্থানীয় কেইজনমান যুৱকে ভুৱা চি আই ডি বিষয়া বিৰাজক উত্তম–মধ্যম শোধাই পল্টন বজাৰ আৰক্ষীক গতাই দিয়ে৷ আৰক্ষীয়ে জানিবলৈ দিয়া মতে, বিৰাজ দাস আৰু কেইজনমান যুৱকে মহানগৰীৰ বিভিন্ন স্থানত সুযোগ বুজি নিজকে চি আই ডিৰ বিষয়া বুলি পৰিচয় দি ধন সংগ্রহ কৰি আহিছে৷ ভুৱা চি আই ডি বিষয়াজনৰ পৰা পাঁচ হাজাৰ টকা আৰক্ষীয়ে উদ্ধাৰ কৰিবলৈ সক্ষম হয়৷ অৱশ্যে ভিৰৰ সুযোগ লৈ বিৰাজৰ দুই সহযোগীয়ে পলায়ন কৰিবলৈ সক্ষম হয়।