নিয়মীয়া বাৰ্তা ২০ ফেব্ৰুৱাৰীঃ সাংস্কৃতিক ক্ষেত্রত ৰাষ্ট্রীয় পুৰস্কাৰপ্রাপক শিল্পী নিখিলেশ বৰুৱাৰ প্রযোজনাৰে জনপ্রিয় পৰিচালক লর্ড দাসৰ নিখুঁত পৰিচালনাৰে শীঘ্রেই মুক্তি পাবলগীয়া বিগ বাজেটৰ অসমীয়া বোলছবি অনন্যাৰ স্মাৰকযুক্ত দিনপঞ্জী বুধবাৰে মুকলি কৰা হয়৷ এন এল প্রডাকচনৰ বেনাৰত নির্মিত অনন্যা তিনিবাৰকৈ প্রকৃত প্রেমত বিফল হৈ সুৰা–ড্রাগছৰ প্রতি আসক্ত পুত্রৰ অশালীনব্যৱহাৰত কেনেকৈ জন্মদাত্রী এগৰাকী মাতৃয়ে মৃত্যুক আঁকোৱালি লয় তাৰে এক সামাজিক কৰুণ কাহিনীৰ ভিত্তিত সুন্দৰভাৱে কাহিনীভাগ আগবঢ়াই দর্শকক এক অনবদ্য উপহাৰ আগবঢ়াবলৈ সক্ষম হ’ব বুলি পৰিচালক লর্ড দাসে দাবী কৰিছে৷ জ্যোতি চিত্রবনৰ উপৰি অসমৰ প্রকৃতিৰ সেউজী কোলাত দৃশ্য গ্রহণ কৰি চৰিত্রসমূহ সূক্ষ্মভাৱে অংকন কৰা অনন্যা বোলছবিৰ চিত্রনাট্য, সংলাপ ৰচনা সুমিত্রা গোস্বামীৰ৷ জনপ্রিয় কণ্ঠশিল্পী জুবিন গার্গ, ভাস্বতী ভাৰতী, নিখিলেশ বৰুৱা আৰু জুবলীয়ে কণ্ঠ নিগৰোৱা বোলছবি অনন্যাৰ সংগীত পৰিচালনা কৰিছে দিগন্ত ভাৰতীয়ে৷ জনপ্রিয় অভিনেতা নিপন গোস্বামী, জয়ন্ত ভাগৱতী, চেতনা দাস, সুমিত্রা গোস্বামী, পল্লৱী বৰা, ৰাতুল শর্মাই অভিনয় কৰা বোলছবিখনৰ প্রচাৰ পৰিকল্পনা জ্যেষ্ঠ সাংবাদিক মণ্টু শইকীয়া আৰু কমল কুমাৰৰ৷ আজি গুৱাহাটী প্রেছ ক্লাবত দিনপঞ্জী মুকলি অনুষ্ঠানত গীতিকাৰ জ্যোতিষ কুমাৰ দেৱ, টোকাৰী গীতৰ শিল্পী বিপিন চন্দ্র শইকীয়া, সাহিত্যিক ড০ যতীন্দ্র নাথ ডেকা, অনন্যা বোলছবিৰ প্রযোজক নিখিলেশ বৰুৱা, অভিনেতা ভার্গৱ কটকী, আন্তঃৰাষ্ট্রীয় বাঁহীবাদক দীপক শর্মা, বিহু সম্রাজ্ঞী সীমা বৰা, সমাজসেৱিকা পাৰুল বৰুৱা, সাহিত্যক সন্জীৱ মহন্ত আৰু গর্গেশ্বৰ দাস উপস্থিত থাকে৷