নিয়মীয়া বাৰ্তা, ১৮এপ্ৰিলঃ ৰাজ্যৰ বিভিন্ন প্রান্তৰ লগতে গুৱাহাটী মহানগৰীতো ক’ভিড সংক্রমণ দ্রুত হাৰত বৃদ্ধি হোৱাৰ প্রতি লক্ষ্য ৰাখি অসম জাতীয় বিদ্যালয়ে শৈক্ষিক কার্যসূচী সন্দর্ভত কেতবোৰ গুৰুত্বপূর্ণ সিদ্ধান্ত গ্রহণ কৰিছে৷
মহানগৰীৰ নুনমাটিস্থিত অসম জাতীয় বিদ্যালয়ৰ অধ্যক্ষ ঘনশ্যাম মেধিয়ে এক জাননীযোগে প্রকাশ কৰা অনুসৰি অহা ১৯ এপ্রিলত সকলো শিক্ষার্থীৰ বাবে বিদ্যালয় বন্ধ থাকিব৷ আনহাতে, ২০ এপ্রিলৰ পৰা পৰৱর্তী জাননী নিদিয়া পর্যন্ত অংকুৰ শ্রেণীৰ পৰা পঞ্চম শ্রেণীলৈ সকলো শিক্ষার্থীৰ বাবে বিদ্যালয় বন্ধ থাকিব৷ এই বন্ধ দীঘলীয়া হ’লে উক্ত শ্রেণীবোৰৰ শ্রেণীসমূহ অনলাইনযোগে অনুষ্ঠিত হ’ব৷ এই বিষয়ে পৰৱর্তী সময়ত শিক্ষার্থীসকলক বিদ্যালয়ৰ তৰফৰ পৰা জনোৱা হ’ব৷
অৱশ্যে ২০ এপ্রিলৰ পৰা ষষ্ঠ শ্রেণীৰ পৰা দশম শ্রেণীলৈ ৫০ শতাংশ শিক্ষার্থীৰ উপস্থিতিত শ্রেণীসমূহ অনুষ্ঠিত হ’ব যদিও এইক্ষেত্রত প্রতিটো শ্রেণীৰ প্রতিটো শাখা দুটা গোটত ভাগ কৰা হ’ব৷ সেই অনুসৰি ‘ক’ গোটত ৰোল নং ১ৰ পৰা ২০ লৈ আৰু ‘খ’ গোটত ২১ৰ পৰা শেষৰজন শিক্ষার্থী থাকিব৷ ‘ক’ গোটৰ শ্রেণীবোৰ সোমবাৰ, বুধবাৰ আৰু শুকুৰবাৰে অনুষ্ঠিত হ’ব৷
আনহাতে ‘খ’ গোটৰ শ্রেণীবোৰ মঙলবাৰ, বৃহস্পতিবাৰ আৰু শনিবাৰে অনুষ্ঠিত হ’ব৷ শনিবাৰৰ শ্রেণীবোৰ সোমবাৰৰ ৰুটিন অনুযায়ী অনুষ্ঠিত হ’ব৷ জাননীখনত উল্লেখ কৰা মতে ২৪ এপ্রিলত অনুষ্ঠিত হ’বলগীয়া প্রীতি ফুটবল আৰু ২৬ এপ্রিলৰ পৰা ২৮ এপ্রিললৈ অনুষ্ঠিত হ’বলগীয়া বিদ্যালয়ৰ বার্ষিক প্রতিযোগিতাৰ কার্যসূচী বাতিল কৰা হৈছে৷ ২৬ এপ্রিলৰ পৰা ২৯ এপ্রিললৈ হ’বলগীয়া অংকুৰ শ্রেণীৰ শিশুৰ গৃহ পৰিদর্শনৰ কার্যসূচীও বাতিল কৰা হৈছে৷
আনহাতে, শিক্ষার্থীৰ বাবে বিদ্যালয় কেণ্টিন বন্ধ থাকিব আৰু শিক্ষার্থীসকলে টিফিন ঘৰৰ পৰা আনিব লাগিব৷ ছাত্র–ছাত্রীকে ধৰি সকলোৱে মাস্ক পৰিধান কৰাটো বাধ্যতামূলক৷ সকলো শিক্ষার্থীয়ে নিজৰ বাবে ছেনিটাইজাৰৰ সৰু বটল একোটা লগত লৈ আহিব লাগিব৷