নিয়মীয়া বাৰ্তা ২৭ এপ্ৰিলঃ আজাৰা আৰক্ষী থানা এলেকাৰ ৰাইবৰীত ৩৭নং ৰাষ্ট্রীয় ঘাইপথত সংঘটিত এটা পথ দুর্ঘটনাত ৩জন লোক আহত হয়৷ আহত লোককেইজন মইনুল হক (২২), চামিনুল ইছলাম (২১) আৰু মইনুল ইছলাম (৪২)৷ আহত লোককেইজন দুর্ঘটনাগ্রস্ত বাছৰ কর্মচাৰী৷ আৰক্ষী সূত্রই সদৰী কৰা মতে, যোৱানিশা প্রায় ১১ বজাত জালুকবাৰীৰ পৰা ধুবুৰীলৈ গৈ থকাAS-01 GC-7185 নম্বৰৰ বাছখনে আজাৰাৰ ৰাইবৰীত ৩৭নং ৰাষ্ট্রীয় ঘাইপথৰ দাঁতিৰ গছ এডালত খুন্দিয়াই কিছু দূৰৈৰ এঘৰ লোকৰ চোতালত ৰৈ যায়৷ বাছখনত আন কোনো যাত্রী নথকাত বাছখনৰ কর্মচাৰী তিনিজন আহত হয়৷ ঘটনাৰ খবৰ পায়ে আজাৰা আৰক্ষী থানাৰ যান–বাহন আৰক্ষী ঘটনাস্থলীত উপস্থিত হৈ আহতসকলক চিকিৎসালয়ত ভর্তি কৰায়৷ পিছত বাছখন আজাৰা আৰক্ষী থানালৈ অনা হয়৷