নিয়মীয়া বাৰ্তা, ১৭ মাৰ্চঃ আৰক্ষী প্রশাসনক মেনেজ কৰি একাংশ অসাধু ব্যৱসায়ীয়ে মহানগৰীৰ বিভিন্ন স্থানৰ সদাব্যস্ত পথ, পদপথ দখল কৰি ব্যৱসায় চলাই আহিছে৷ পথ পদপথ দখল কৰি ব্যৱসায় চলাই অহাৰ ফলতেই অঞ্চলবিশেষে সংঘটিত হৈছে সৰু–বৰ দুর্ঘটনা৷ ইয়াৰ উপৰি পথ–পদপথ দখল কৰি অবৈধভাৱে ব্যৱসায় চলোৱা অঞ্চলসমূহত তীব্র যান–জঁটত অতিষ্ঠ হ’বলগীয়া হৈছে জনসাধাৰণ৷ শেহতীয়াকৈ সদাব্যস্ত পল্টনবজাৰ–লখৰা সংযোগী পথৰ পথ আৰু পদপথ দখল কৰি একাংশ ব্যৱসায়ীয়ে চলাই অহাৰ ফলত উক্ত পথটোত তীব্র যান–জঁটৰ সন্মুখীন হৈ আহিছে জনসাধাৰণ৷
সদাব্যস্ত পথটোত লালগণেশৰ পৰা জ্যোতিকুছিলৈকে পথৰ দুয়োকাষে একাংশ অসাধু ব্যৱসায়ীয়ে পথ আৰু পদপথ দখল কৰি ব্যৱসায় কৰি অহাৰ ফলত যান–জঁট সৃষ্টি হোৱাৰ লগতে কেইবাটাও সৰু–বৰ দুর্ঘটনা সংঘটিত হৈছে৷ এনেদৰে সদাব্যস্ত পথটোৰ পথ আৰু পদপথ দখল কৰি ব্যৱসায় চলাই অহা ব্যৱসায়ীৰ বিৰুদ্ধে ব্যৱস্থা গ্রহণ কৰিবলৈ অসম জাতীয়তাবাদী যুৱ–ছাত্র পৰিষদৰ দক্ষিণ গুৱাহাটী আঞ্চলিক সমিতিয়ে জিলা প্রশাসনক আহ্বান জনাইছে৷ দক্ষিণ গুৱাহাটী আঞ্চলিক সমিতিৰ সভাপতি বিপুল গোস্বামীৰ নেতৃত্বত যোৱা এটা দলে মহানগৰ জিলা উপায়ুক্ত বিশ্বজিৎ পেগুক শীঘ্রে এইক্ষেত্রত ব্যৱস্থা গ্রহণৰ দাবীৰে এখন স্মাৰক–পত্র প্রদান কৰে৷ সঁজাতী দলটোত উপদেষ্টা হেমন্ত দাস, কার্যালয় সম্পাদক প্রাঞ্জল দাস, প্রচাৰ সম্পাদক অশোক ৰায় উপস্থিত আছিল৷