নিয়মীয়া বার্তা, ২০ অক্টোবৰঃ মহানগৰীৰ পল্টনবজাৰ আৰক্ষীয়ে কালি যাত্রীৰ ধন লুট কৰাৰ অভিযোগত এখন চিটীবাছ জব্দ কৰাৰ লগতে এজন বাছ কর্মচাৰীক আটক কৰে৷ ভুক্তভোগীয়ে এজাহাৰত উল্লেখ কৰা মতে,খানাপাৰাৰ পৰা আজি পুৱা সৌৰভ চৌধুৰী নামৰ এজন লোকে পল্টনবজাৰ অভিমুখে গৈ থকাৰ সময়তে এ এছ–১২–এচি–১১৩০ নম্বৰৰ বাছৰ কর্মচাৰীয়ে যাত্রীগৰাকীৰ ধন লুট কৰাৰ সন্দেহ ব্যক্ত কৰে৷
ঘটনা অনুসৰি যাত্রীজনে খানাপাৰাৰ পৰা বাছখনেৰে গৈ পল্টনবজাৰত নমাৰ সময়তে তেওঁৰ মানী বেগটো বিচাৰি নাপাই চুৰি হোৱাটো নিশ্চিত হয়৷ পিছত বাছখন ৰখাবলৈ কয় যদিও চালকে বাছখন ৰখোৱাৰ বিপৰীতে গতিবেগ বঢ়াই ঘটনাস্থলীৰ পৰা গুচি আহে৷ ঘটনা সন্দর্ভত পল্টনবজাৰ থানাত এজাহাৰ দাখিল কৰাত আৰক্ষীয়ে বাছখন জব্দ কৰাৰ লগতে এজন কর্মচাৰীক আটক কৰি সোধা–পোছা অব্যাহত ৰাখিছে৷