নিয়মীয়া বাৰ্তা, ২১ নৱেম্বৰঃ নীৰ নির্মল পৰিযোজনাৰ অধীনত বিশ্ব বেংকৰ পুঁজিৰে জনস্বাস্থ্য কাৰিকৰী বিভাগে নির্মাণ কৰা পানী যোগান প্রকল্পসমূহ আজিও সম্পূর্ণ হৈ উঠা নাই৷ বিশুদ্ধ খোৱাপানী যোগানৰ লক্ষ্যৰে কামৰূপ, যোৰহাট, হাইলাকান্দি, শিৱসাগৰ, মৰিগাঁও, বঙাইগাঁৱকে ধৰি কেইবাখনো জিলাত নীৰ নির্মল পৰিযোজনাৰ অধীনত শ শ কোটি টকা ব্যয়েৰে পানী যোগান প্রকল্প নির্মাণৰ আঁচনি লোৱা হৈছিল৷
কিন্তু জনস্বাস্থ্য কাৰিকৰী বিভাগ আৰু ঠিকাদাৰী প্রতিষ্ঠানৰ লুণ্ঠনৰ বাবে আজিও এই পানী যোগান প্রকল্পকেইটা সম্পূর্ণ হৈ উঠা নাই৷ উদাহৰণস্বৰূপে চন্দ্রপুৰত ২৬৮.৭৬ কোটি টকা ব্যয়েৰে নীৰ নির্মল পৰিযোজনাৰ অধীনত এখন অভিলাষী পানী যোগান আঁচনি গ্রহণ কৰা হৈছিল৷ এই আঁচনিখনৰ অধীনত ১৬খন পঞ্চায়তৰ অধীনস্থ ১৭২খন গাঁৱৰ ৰাইজক ২৪ ঘণ্টাই পানী যোগান ধৰাৰ কথা আছিল৷ চন্দ্রপুৰ অঞ্চলৰ ৪২খন গাঁও আৰু ডিমৰীয়া অঞ্চলৰ ১৩০খন গাঁৱৰ ৩৯,২২৯টা পৰিয়ালক পানী যোগান ধৰাৰ লক্ষ্য স্থিৰ কৰিছিল৷
কিন্তু জনস্বাস্থ্য কাৰিকৰী বিভাগ আৰু ঠিকাদাৰী প্রতিষ্ঠানৰ লুণ্ঠনৰ বাবেই এই আঁচনিখন সম্পূর্ণ হৈ নুঠিল৷ আঁচনিখন সম্পূর্ণ নৌহওঁতেই চৰকাৰে বাহ্ বাহ্ ল’বলৈ পানী যোগান প্রকল্পটো মুকলি কৰি দিয়ে৷ এই প্রকল্পটোৰ অধীনত ১৭২খন গাঁৱত পানী যোগান ধৰাৰ কথা আছিল যদিও বর্তমান মাত্র চন্দ্রপুৰ অঞ্চলৰ ৫খন গাঁৱৰ ৰাইজেহে মাজে সময়ে পানী লাভ কৰি আহিছে৷ জনস্বাস্থ্য কাৰিকৰী বিভাগৰ তত্ত্বাৱধানত নির্মীয়মাণ পানী যোগান প্রকল্পটোৰ ঠিকা লাভ কৰিছিল এমআইএছ–শিৱম–জিডি নামৰ ঠিকাদাৰী প্রতিষ্ঠানে৷
জনস্বাস্থ্য কাৰিকৰী বিভাগৰ দুর্নীতিগ্রস্ত বিষয়া–কর্মচাৰী আৰু ঠিকাদাৰী প্রতিষ্ঠানৰ লুণ্ঠনৰ বাবেই প্রকল্পটো এতিয়াও সম্পূর্ণ হৈ নুঠাৰ অভিযোগ উত্থাপন হৈছে৷ এই পানী যোগান প্রকল্পটোৰ বাবে বিশ্ব বেংকে ৫০ শতাংশ ঋণ প্রদান কৰিছিল৷ কেন্দ্রীয় চৰকাৰে ৰাষ্ট্রীয় গ্রাম্য খোৱাপানী আঁচনিৰ অধীনত ৪৪.৫ শতাংশ ধন, ৰাজ্য চৰকাৰে ৪.৫ শতাংশ ধন প্রদান কৰিছিল৷
জনস্বাস্থ্য কাৰিকৰী বিভাগে পানী যোগান প্রকল্পটো নির্মাণৰ বাবে সম্পূর্ণ ধন লাভ কৰাৰ পিছতো প্রকল্পটো আজিও সম্পূর্ণ নহ’ল৷ ৰাজ্য চৰকাৰে এই প্রকল্পটো নির্মাণৰ দায়িত্বত থকা জনস্বাস্থ্য কাৰিকৰী বিভাগ আৰু ঠিকাদাৰী প্রতিষ্ঠানৰ বিৰুদ্ধে চৰজমিন তদন্ত কৰিলেই প্রকল্পটো ৰূপায়ণৰ নামত সংঘটিত দুর্নীতি ফাদিল হ’ব৷