জিএমচিক নলা নিষ্কাশনৰ নির্দেশ

নিয়মীয়া বাৰ্তা, ১৭ জুলাইঃ উলুবাৰীস্থিত বৰঠাকুৰ মিলৰ ৭–৮নং উপ–পথত কৃত্রিম বানৰ বুজ লয় স্থানীয় বিধায়ক তথা গুৱাহাটী উন্নয়ন মন্ত্রী সিদ্ধার্থ ভট্টাচার্যই৷ লগতে নলা–নর্দমাসমূহ পৰিষ্কাৰ কৰাৰ বাবে গুৱাহাটী পৌৰ নিগমক নির্দেশ দিয়ে৷ তাৎক্ষণিকভাৱে দুটা পাম্পেৰে পানী নিষ্কাশন কৰাৰ ব্যৱস্থা গ্রহণ কৰে৷ আনহাতে, মন্ত্রীগৰাকীয়ে বাণিজ্যিক কেন্দ্র ফাঁচীবজাৰত উপস্থিত হৈ ব্যৱসায়িক প্রতিষ্ঠানসমূহত ছাডেন ভিজিট দিয়ে৷

লকডাউনৰ সময়ছোৱাত যাতে স্বাস্থ্য বিভাগে আৰোপ কৰা নীতি–নিয়ম কোনো ব্যৱসায়িক প্রতিষ্ঠানে ভংগ নকৰে, তাৰ বাবেই ব্যৱসায়ীসকলক সতর্ক কৰি দিয়ে৷ ইপিনে, অমৃত ভাণ্ডাৰ নামৰ ব্যৱসায়িক প্রতিষ্ঠানখনে লকডাউনৰ সময়ছোৱাত দৰিদ্র পৰিয়ালৰ কাষত থিয় দিয়ে৷ প্রতিষ্ঠানখনে অতি দৰিদ্র পৰিয়ালৰ মাজত চাউল, দাইল, আটা, আলু, মিঠাতেল বিতৰণ কৰে৷ সামগ্রী বিতৰণ অনুষ্ঠানত মন্ত্রী ভট্টাচার্যই নিজাববীয়াকৈ অমৃত ভাণ্ডাৰ নামৰ ব্যৱসায়িক প্রতিষ্ঠানক এই কার্যসূচীৰ বাবে সাহর্য আগবঢ়ায়৷ এই মানৱীয়তাৰ বাবেই অমৃত ভাণ্ডাৰৰ স্বত্বাধিকাৰীক ধন্যবাদ জ্ঞাপন কৰে মন্ত্রী ভট্টাচার্যই৷