নিয়মীয়া বাৰ্তা ২৯ জানুৱাৰীঃ বিজেপি মিত্রজোঁটৰ চৰকাৰখনে দুর্নীতিৰ বিৰুদ্ধে গ্রহণ কৰা শূন্য সহনশীল স্থিতিক একাংশ চৰকাৰী বিষয়াই অংগুষ্ঠ প্রদর্শন কৰি আহিছে৷ ইয়াৰে অন্যতম উদাহৰণ হ’ল ৰাণী বনাঞ্চলিক বিষয়াৰ কার্যালয় আৰু ৰাণী আৰক্ষী চকী৷ স্থানীয় ৰাইজৰ অভিযোগ অনুসৰি, চৰকাৰী নীতি–নির্দেশনা উলংঘাৰে ৰাণীত বনাঞ্চলিক বিষয়া আৰু ৰাণী আৰক্ষী চকীৰ ভাৰপ্রাপ্ত বিষয়াৰ নেতৃত্বত একাংশ বন মাফিয়াই নিশাৰ ভাগত শিল–বালি আৰু কাঠৰ চোৰাং বেহা অব্যাহত ৰাখিছে৷ অসম–মেঘালয়ৰ সীমামূৰীয়া ৰিভয় জিলাৰ অন্তর্গত ৰাণীৰ সমীপৱর্তী অঞ্চলত ক্রেচাৰ আৰু শিলৰ কোৱেৰী বহুৱাই দীর্ঘদিনে একাংশ প্রভাৱশালী বন মাফিয়াই ব্যৱসায় চলাই আহিছে৷
মেঘালয়ৰ একাংশ চৰকাৰী বিষয়া–কর্মচাৰী, ৰাণী বনাঞ্চলিক বিষয়া, ৰাণী আৰক্ষী চকীৰ বিষয়াক মেনেজ কৰি বিগত দুমাহ ধৰি এই বন মাফিয়াসকলে নিশাৰ ভাগত কৰফাঁকিৰে শিল–বালি আৰু কাঠৰ চোৰাং ব্যৱসায় চলাই আহিছে৷ অভিযোগ অনুসৰি, চাৰি গৰাকীকৈ বন মাফিয়াৰ নেতৃত্বত ৰাণী হৈ শিল–বালি আৰু কাঠৰ চোৰাং বেহা চলি আহিছে৷ মেঘালয় আৰক্ষী, ৰাণী বনাঞ্চলিক বিষয়া আৰু ৰাণী আৰক্ষীক মেনেজ কৰি নিশাৰ ভাগত শ শ ডাম্পাৰেৰে শিল–বালি আৰু কাঠ কঢ়িয়াই আহিছে এইকেইটা কুখ্যাত বন মাফিয়াই৷ ৰাণীৰ মাজেৰে চলি থকা শিল–বালি–কাঠৰ চোৰাং বেহা বন্ধ কৰাৰ বাবে চৰকাৰ আৰু প্রশাসনে কি ব্যৱস্থা গ্রহণ কৰে, সেয়া লক্ষণীয় হ’ব৷