নিয়মীয়া বাৰ্তা, ২০ ফেব্ৰুৱাৰীঃ নাৰেংগী–চন্দ্রপুৰ পথৰ দাঁতিত একাংশ ব্যৱসায়ীয়ে য’ত–ত’ত বালিৰ দ’ম কৰাৰ ফলত যাতায়াতৰ বাবে যথেষ্ট অসুবিধাৰ সন্মুখীন হোৱা পৰিলক্ষিত হৈছে যান–বাহন আৰু পথচাৰী৷ ইয়াৰ ফলত আনকি দুর্ঘটনাপ্রৱণ হৈ উঠিছে সংশ্লিষ্ট পথটো৷ উল্লেখ্য যে চন্দ্রপুৰ খণ্ড বন কার্যালয়ৰ অধীনৰ এলেকাত বন বিভাগ আৰু জিলা প্রশাসনৰ দ্বাৰা বহুকেইটা ব্রহ্মপুত্রৰ বালিৰ খাদানৰ অনুমতি প্রদান কৰা হৈছে৷ এই খাদানসমূহৰ পৰা ব্যৱসায়ীসকলে চন্দ্রপুৰ, পানীখাইতী আৰু মহানগৰীৰ বিভিন্ন প্রান্তলৈ বালি সৰবৰাহ কৰে৷ কিন্তু যোৱা কিছুদিনৰ পৰা একাংশ ব্যৱসায়ীয়ে বিশেষকৈ পানীখাইতীৰ পৰা চন্দ্রপুৰৰ মাজৰ মূল পথছোৱাৰ দাঁতিত বিভিন্ন স্থানত জধে–মধে বালিৰ দ’ম কৰি থৈছে৷
বহু স্থানত আনকি ঘাইপথৰ প্রায় অর্ধেক অংশপর্যন্ত বালিৰ দ’ম কৰা দেখা গৈছে৷ ইয়াৰ ফলত পথেৰে যান–বাহন চলাচল কৰাৰ ক্ষেত্রত চালকসকল অসুবিধাৰ সন্মুখীন হ’বলগীয়া হৈছে৷ বিশেষকৈ নিশাৰ ভাগত বাহন চলাচলত অধিক অসুবিধা হোৱাৰ লগতে দুর্ঘটনাৰ আশংকা বৃদ্ধি পাইছে নির্দিষ্ট স্থানকেইটাত৷ একেদৰে পথৰ দাঁতিত বালিৰ দ’মসমূহ থকাত পথচাৰীসকলৰ বাবেও সমস্যা হৈ পৰিছে৷ কিয়নো বহুকেইটা স্থানত পথৰ দাঁতিত বালি জমা কৰি থোৱাত গাড়ী চলাচল কৰাৰ সময়ত পদপথ হিচাপে ঠাই নথকাত খোজকাঢ়ি যোৱাত আহুকাল হোৱাই নহয়, দুর্ঘটনাৰ আশংকাত ভুগিছে অঞ্চলবাসী৷
বালিৰ ধুমুহাৰ ফলত চকু মুদি চলাচল কৰিব লগা হৈছে অঞ্চলবাসীয়ে৷ বিশেষকৈ কণ কণ ল’ৰা–ছোৱালীৰ বহুতে চকু ৰোগত ভুগিব লগা হৈছে৷ আশ্চর্যকৰ কথা যে পথৰ দাঁতিত বিপজ্জনকভাৱে এনেদৰে বালিৰ দ’মসমূহ থকাৰ পিছতো বন বিভাগ আৰু আৰক্ষী প্রশাসনে চকু মুদা কুলিৰ ভাও ধৰি আছে বুলি অভিযোগ উত্থাপন হৈছে৷ এই ক্ষেত্রত শীঘ্রে ব্যৱস্থা গ্রহণৰ দাবী জনাইছে স্থানীয় ৰাইজে৷