নিয়মীয়া বাৰ্তা ১২ ডিচেম্বৰঃ চুপাৰি মাফিয়াই ন ন কৌশলেৰে বার্মিজ চুপাৰিৰ চোৰাং সৰবৰাহ অব্যাহত ৰাখিছে৷ শেহতীয়াকৈ এই চোৰাং সৰবৰাহকাৰী চক্রটোৱে বাছেৰে গুৱাহাটীলৈ বার্মিজ চুপাৰি সৰবৰাহ কৰাৰ তথ্য পোহৰলৈ আহিছে৷ মহানগৰ আৰক্ষীয়ে লাভ কৰা তথ্যৰ ভিত্তিত আজি আইএছবিটিত অভিযান চলাই বৃহৎ পৰিমাণৰ চোৰাং বার্মিজ চুপাৰি জব্দ কৰিবলৈ সক্ষম হয়৷ বহিঃৰাজ্যৰ পৰা বাছেৰে কঢ়িয়াই আনি নিশাৰ ভাগত আইএছবিটিত এই বার্মিজ চুপাৰিৰ বস্তাসমূহ পেলাই থৈ গৈছিল৷ শুকুৰবাৰে পুৱা এএছ–২৫ইচি–১২৯৯ নম্বৰৰ গাড়ীখনত বস্তাসমূহ উঠাই থকাৰ সময়তে আৰক্ষীয়ে চোৰাং বার্মিজ চুপাৰিখিনি জব্দ কৰে৷ আইএছবিটিৰ পৰা সর্বমুঠ ৬১ বেগ বার্মিজ চুপাৰি আৰক্ষীয়ে জব্দ কৰি সীমা শুল্ক বিভাগক গতাই দিয়ে৷ আৰক্ষীয়ে বার্মিজ চুপাৰি কঢ়িওৱা বাহনখনৰ চালক আৰু হেণ্ডিমেনক আটক কৰে৷ এই বার্মিজ চুপাৰিখিনি বৰপেটাৰ হাউলীলৈ নিয়াৰ কথা আছিল৷