যোৰাবাটত তীব্রবেগী ট্রাকৰ খুন্দাত মহিলাৰ মৃত্যু

নিয়মীয়া বাৰ্তা ১২ জুলাইঃ যোৰাবাটৰ নর্থ ইষ্ট কেঞ্চাৰ হাস্পতালৰ সন্মুখত দেওবাৰে বিয়লি ভয়াৱহ পথ দুর্ঘটনা সংঘটিত হয়৷ আৰক্ষীয়ে জানিবলৈ দিয়া মতে, দেওবাৰে বিয়লি প্রায় ৪ বজাত সংঘটিত পথ দুর্ঘটনাটোত ঘটনাস্থলীতে এগৰাকী মহিলাৰ মৃত্যু হোৱাৰ লগতে গুৰুতৰভাৱে আহত স্কুটীৰ চালকজন সংকটজনক অৱস্থাত জিএমচিএইচত চিকিৎসাধীন হৈ আছে৷ সোণাপুৰৰ পৰা গুৱাহাটী অভিমুখে আহি থকা এনএল–০১কিউ–৪৯৮৬ নম্বৰৰ ট্রাকখনে একে দিশেৰে আহি থকা এএছ–০১ডিএ–২৭৪৭ নম্বৰৰ স্কুটীখন মহটিয়াই নিয়াৰ ফলতেই এই শোকাৱহ দুর্ঘটনাটো সংঘটিত হয়৷ যোৰাবাট আৰক্ষীয়ে দুর্ঘটনা সংঘটিত কৰা ট্রাকখন জব্দ কৰাৰ লগতে চালকজনক আটক কৰে৷