নিয়মীয়া বাৰ্তা ১৩ ডিচেম্বৰঃ গুৱাহাটী মহানগৰীৰ বিভিন্ন স্থানত ভূ–মাফিয়াই তাণ্ডৱ চলাই আহিছে৷ ৰাজনৈতিক আশিসপুষ্ট একাংশ ভূ–মাফিয়াই মহানগৰীৰ চৰকাৰী ভূমি দখল কৰি অহাৰ লগতে ম্যাদী পট্টাৰ ভূমিও ভয়–ভাবুকিৰে দখল কৰি আহিছে৷ আজি দিন–দুপৰতে লাচিত নগৰত ভূ–মাফিয়াই শিক্ষাবিদ ড০ দয়ানন্দ পাঠকক ভাবুকি প্রদান কৰে৷ শিক্ষাবিদ পাঠকে জানিবলৈ দিয়া মতে, বিয়লি প্রায় ৩ বজাত ভাইতি বড়োৰ নেতৃত্বত অহা ২জনীয়া দুর্বৃত্তৰ দলটোৱে পাঠকক চৰকাৰী মাটিত বসবাস কৰি অহা বুলি ভয়–ভাবুকি প্রদান কৰি শীঘ্রে উক্ত ভূমিখিনি খালী কৰিবলৈ নির্দেশ দিয়ে৷ এই ঘটনা সন্দর্ভত ভুক্তভোগী পাঠকে পল্টন বজাৰ থানাত এটা গোচৰ ৰুজু কৰে৷