নিয়মীয়া বাৰ্তা ৩১ জুলাইঃ মহানগৰীৰ দাঁতিকাষৰীয়া অসম–মেঘালয় সীমান্তৰ ৰাণী গুইমাৰীৰ এগৰাকী শতায়ু গৰকা আইতাৰ কৰুণগাথাই আপোনাৰো মন চুই যাব৷ জীৱনৰ বিয়লিবেলাত খোজ দি আত্মীয় সকলোকে হেৰুৱাই এতিয়া অসহায় হৈ পৰিছে৷ গুৱাহাটী মহানগৰীৰ ৫৪নং পশ্চিম গুৱাহাটী বিধানসভা সমষ্টিৰ ৰাণীৰ গুইমাৰীত ঘৰ এইগৰাকী শতায়ু গৰকা চাৰু ৰাভা নামৰ আইতাৰ৷ জৰাজীর্ণ এটা ঘৰত দিন–ৰাতি পাৰ কৰা চাৰু ৰাভাৰ কিছু বছৰ পূর্বে স্বামী যোগেন ৰাভাৰ মৃত্যু হৈছিল৷
ইফালে, একমাত্র পুত্র, দুই কন্যাকো স্বামীৰ মৃত্যুৰ পিছতেই নিষ্ঠুৰ নিয়তিয়ে কাঢ়ি লৈ যোৱাৰ পিছত থানবান হৈ যায় পৰিয়ালটো৷ কাণেৰে–চকুৰে ভালকৈ দেখা আৰু শুনা নোপোৱা আইতাই খুজি–মাগি কোনোমতে দুবেলা দুমুঠি যোগাৰ কৰি পেটৰ ভাতমুঠি মোকলায় যদিও বেমাৰ হ’লে লঘোণে দিন–ৰাতি কটায়৷ অৱশ্যে অঞ্চলটোৰ হূদয়ৱান দুই–এগৰাকী লোকে আইতাক মাজে–সময়ে সহায়ৰ হাত আগবঢ়ায়৷ ৰজাঘৰীয়াই দুখীয়া লোকৰ বাবে অভিলাষী একাধিক আঁচনি ঘোষণা কৰিছে যদিও চাৰু ৰাভাৰ দৰে অসহায় লোকক ঢুকি নোপোৱা বিষয়টোহে গুৰুত্বপূর্ণ৷