নিয়মীয়া বাৰ্তা, ১৮ জানুৱাৰীঃ পথ দুর্ঘটনা প্রতিহত কৰাৰ উদ্দেশ্যে প্রতিবছৰ দৰে এইবাৰো ৰাজ্যৰ লগতে মহানগৰীত অনুষ্ঠিত হ’ব পথ সুৰক্ষা সপ্তাহ৷ চডক সুৰক্ষা জীৱন ৰক্ষা শ্লোগানেৰে অহা ২০ জানুৱাৰীৰ পৰা ১৭ ফেব্রুৱাৰীলৈ মহানগৰীত অনুষ্ঠিত হ’ব এই পথ সুৰক্ষা সপ্তাহ৷বুধবাৰে মহানগৰীৰ শ্রদ্ধাঞ্জলি কাননত শুভাৰম্ভ হ’ব এই পথ সুৰক্ষা সপ্তাহ৷ এই শুভাৰম্ভ অনুষ্ঠানৰ পাছতে শিক্ষার্থীসকলৰ মাজত পথ সুৰক্ষা সজাগতা বিষয়ক লৈ অনুষ্ঠিত হ’ব চিত্রাংকন প্রতিযোগিতা৷ ইতিমধ্যে পথ সুৰক্ষা সপ্তাহ সুচাৰুৰূপে সম্পূর্ণ কৰিবলৈ কামৰূপ জিলাৰ উপায়ুক্ত বিশ্বজিৎ পেগুৰ নেতৃত্বত গঠন কৰা হৈছে এখন কমিটী৷
কামৰূপ জিলা পৰিবহণ বিভাগ, আৰক্ষী প্রশাসন, স্বাস্থ্য বিভাগ, গডকাপ্টানী বিভাগকে ধৰি বিভিন্ন বিভাগৰ সহযোগত চলিছে পথ সুৰক্ষা সপ্তাহৰ প্রস্তুতি৷ উল্লেখ্য যে যুৱপ্রজন্মৰ মাজত ভয়ংকৰ হাৰত বৃদ্ধি পোৱা বাইক ষ্টাণ্ট , গাডী চলাওঁতে ম’বাইল ব্যৱহাৰ কৰা, সুৰাপান কৰি বাহন চলোৱা, ছীটবেল্ট পৰিধান নকৰাকৈ বাহন চলোৱা আদি দিশসমূহ হ্রাস কৰাই অন্যতম উদ্দেশ্য হ’ব এইবাৰৰ পথ সুৰক্ষা সপ্তাহৰ৷ ইফালে, পথ সুৰক্ষা সপ্তাহৰ কার্যসূচী সফলভাৱে ৰূপায়ণ কৰিবলৈ সকলোৰে সহায়–সহযোগিতা বিচাৰিছে কামৰূপ জিলা পৰিবহণ বিষয়া গৌতম দাসে৷