নিয়মীয়া বাৰ্তা, ২৫ মেঃ মহানগৰীৰ পশ্চিম প্রান্তৰ আজাৰা ৰাজহ চক্র তথা আজাৰা থানাৰ অন্তর্গত অঞ্চলসমূহত নাই কোনো ধৰণৰ ক’ভিডকেন্দ্রিক ভয়াৱহতা আৰু ৰাজ্য চৰকাৰে জাৰি কৰা ক’ভিড নির্দেশনা৷ উল্লেখনীয় যে আজাৰা থানাৰ অন্তর্গত আজাৰা, ধাৰাপুৰ, খানামুখ, গডল, ভট্টাপাৰা, কাঁহিকুছি, আগছিয়া, মাজিৰগাঁও, কেন্দুকুছি আদি অঞ্চলসমূহত প্রতিদিনে অস্বাভাৱিক হাৰত বৃদ্ধি পাই গৈছে ক’ৰোনাক্রান্ত লোকৰ সংখ্যা৷ চৰকাৰী ক’ভিড নির্দেশনা উলংঘন কৰি উক্ত এলেকাসমূহৰ গ্রামাঞ্চলৰ ভিতৰুৱা দোকানসমূহ দিনৰ ১১ বজাৰ পাছতো খোলা থকা বুলি এক গুৰুতৰ অভিযোগ উত্থাপন হৈছে৷ ধাৰাপুৰ চাৰিআলি চ’কৰ দৈনিক পাচলি আৰু মাছ–মাংসৰ বজাৰখনৰ নাই কোনো ধৰণৰ ক’ভিড প্রট’কল৷
সামাজিক দূৰত্ব বর্তাই নাৰাখি গাতে গা লগাই মানুহে অত্যন্ত ভিৰৰ মাজেৰে বজাৰ–সমাৰ কৰি আছে যদিও আজাৰা আৰক্ষীয়ে এনেবোৰ কার্য দেখিও নেদেখাৰ ভাও ধৰি থকাত স্থানীয় সচেতন নাগৰিকসকল বিতুষ্ট হৈ পৰিছে৷ তদুপৰি বিয়লি হোৱাৰ লগে লগে জাকক জাকে ‘ইভিনিং ৱাক’ কৰিবলৈ নিজ গৃহৰ পৰা ওলাই আহে পুৰুষ–মহিলাকে ধৰি যুৱক– যুৱতী তথা শিশুসকল৷ ক’ৰোনা ভাইৰাছত আক্রান্ত হোৱাৰ পাছত ৰোগীজনক বাদ দি পৰিয়ালৰ আন লোকসকলে ৰাজহুৱা স্থানত মুকলিভাৱে ঘূৰি ফুৰিছে৷
জানিব পৰা মতে বৃহত্তৰ ধাৰাপুৰ গাঁওখনত বর্তমানলৈ শতাধিক লোক ক’ৰোনাক্রান্ত হৈছে৷ ইয়াৰে কেইবাগৰাকী অইন ক’ভিড কেয়াৰ কেন্দ্রত চিকিৎসাধীন হৈ থকাৰ বিপৰীতে আন কেইবাগৰাকী নিজগৃহতে আইছ’লেচনত আছে৷ কিন্তু অতি আশ্চর্যজনক কথা এই যে ক’ৰোনাক্রান্ত হৈ নিজ গৃহতে আইছ’লেচনত থকা ৰোগীজনৰ বাদে পৰিয়ালৰ আন সদস্যসকল দোকান–পোহাৰকে ধৰি আন ৰাজহুৱা স্থানসমূহত মুকলিভাৱে ঘূৰি ফুৰি আছে৷ ক’ৰোনাক্রান্ত লোকৰ পৰিয়ালৰ আন সদস্যসকলে মুকলিভাৱে ৰাজহুৱা স্থানত ঘূৰি ফুৰি থকাৰ পাছতো হোম কোৱাৰেণ্টাইন কমিটীখনে নির্বিকাৰ ভূমিকা গ্রহণ কৰি থকা বিষয়টোৱে বিশেষ চর্চা লাভ কৰিছে৷
লগতে ৰাজ্য চৰকাৰে জাৰি কৰা ক’ভিড প্রট’কল অমান্য কৰি মুকলিভাৱে ঘূৰি ফুৰা ক’ৰোনাক্রান্ত ৰোগীৰ পৰিয়ালৰ আন সদস্যসকলক বুজনি–পৰামর্শ কিম্বা বাধা দিবলৈও অপাৰগতা প্রকাশ কৰি আহিছে হোম কোৱাৰেণ্টাইন কমিটীখনে৷ নিজ গৃহতে সোমাই থকা হোম কোৱাৰেণ্টাইন কমিটীখনৰ সদস্যসকলৰ নির্লিপ্ততাৰ বাবে বৃহত্তৰ ধাৰাপুৰ গাঁওখনলৈ যে অচিৰেই এক ভয়াবহ দুর্যোগ নামি আহিব, সেয়া ইতিমধ্যে প্রতীয়মান হৈ পৰিছে৷ তেনে ক্ষেত্রত কামৰূপ মহানগৰ জিলা উপায়ুক্তক গুৱাহাটী মহানগৰীৰ পশ্চিম প্রান্তৰ প্রতি এক সুদৃষ্টি দিবলৈ আহ্বান জনোৱাৰ লগতে ধাৰাপুৰ অঞ্চলৰ হোম কোৱাৰেণ্টাইন কমিটীখনৰ বিৰুদ্ধে এক বিভাগীয় পদক্ষেপ গ্রহণ কৰিবলৈ দাবী জনাইছে৷