জলবায়ু পৰিৱর্তনৰ ভয়াৱহতা প্রতি ক্ষণে ক্ষণে বৃদ্ধি হৈ আছে৷ পূর্বে ধাৰণা কৰাতকৈ ই অধিক ভয়াৱহ ৰূপ লৈ আছে৷ মানৱসৃষ্ট কাৰকৰ বাবে বৃদ্ধি পাই থকা গোলকীয় উষ্ণতাই জলবায়ু পৰিৱর্তনৰ নেতিবাচকতা বৃদ্ধি কৰিছে৷ মানৱ জাতিক ইতিপূর্বে পৰিৱেশ বিজ্ঞানী, গৱেষকে গোলকীয় উষ্ণতা আৰু জলবায়ু পৰিৱর্তনক লৈ বাৰম্বাৰ সকীয়নি আৰু সতর্কবাণী দি থকাৰ পাছতো কোনো বিশেষ ফলপ্রসূতা দেখা পোৱা নাই৷ দেখাত বহু নীতি আৰু ৰাষ্ট্রসংঘই জলবায়ু চুক্তি মহা ধুমধামেৰে সম্পন্ন কৰে যদিও ই ফুটুকাৰ ফেনত পৰিণত হৈ আছে৷ উন্নত দেশসমূহৰ পক্ষপাতমূলক সিদ্ধান্ত আৰু নিজৰ অতিমাত্রা লাভৰ স্বার্থক গুৰুত্ব দি থকাৰ বাবেই জলবায়ু চুক্তি প্রহসনত পৰিণত হৈছে৷ জলবায়ু পৰিৱর্তনৰ ভয়াৱহতাই উন্নত দেশকো স্পর্শ কৰিছে৷ অৱশ্যে অনুন্নত আৰু দৰিদ্র দেশসমূহে ইয়াৰ অধিক ভয়াৱহতাৰ সন্মুখীন হৈ আহিছে৷ গোলকীয় উষ্ণতা বৃদ্ধিৰ পৰিক্রমা যদি নিয়ন্ত্রণ কৰিব পৰা নাযায়, তেতিয়াহ’লে পৃথিৱীৰ অস্তিত্বৰ প্রতি ভাবুকি অহাটো প্রায় নিশ্চিত বুলি বিজ্ঞানী আৰু গৱেষকে আশংকা কৰি আহিছে৷ তেনেদৰে জলবায়ু পৰিৱর্তনে মানৱ জাতিৰ প্রতি অধিক প্রত্যাহ্বান নমাই আনিব৷ শেহতীয়াকৈ অষ্ট্রেলিয়াৰ গৱেষকৰ দল এটাই জলবায়ু পৰিৱর্তনে পৃথিৱীলৈ অধিক শংকা নমাই আনিব বুলি সতর্কবাণী দিছে৷ পূর্ব ধাৰণাতকৈ অধিক গোলকীয় সম্পত্তিৰ হানি কৰিব৷ গৱেষণাৰ প্রতিবেদনত প্রকাশ পোৱা মতে, যদি গোলকীয় উষ্ণতা ৪ ডিগ্রী চেলছিয়াছ বৃদ্ধি পায়, তেন্তে পৃথিৱীৰ প্রতিগৰাকী মানুহে নিজৰ সম্পত্তি ৪০ শতাংশ হেৰুৱাব পাৰে৷ অর্থাৎ গোলকীয় অর্থনীতি হ্রাস পাব, ব্যক্তি দৰিদ্র হ’ব৷ পূর্বৰ ধাৰণাতকৈ ই চাৰিগুণ অধিক৷
অষ্ট্রেলিয়াৰ ইউনিভার্ছিটী অৱ নিউ ছাউথ ৱেলছৰ ইনষ্টিটিউট ফৰ ক্লাইমেট ৰিস্ক এণ্ড ৰেছপন্সৰ ড০ টিম’থী নিলৰ নেতৃত্বত গৱেষকৰ দলটিৰ অধ্যয়নৰ প্রতিবেদন এনভাইৰনমেণ্টেল ৰিছার্চ পত্রিকাত প্রকাশ পাইছে৷ এই প্রতিবেদনত প্ৰকাশ পোৱা মতে প্রাক্ ঔদ্যোগিক সময়ত যদি ২ ডিগ্রী চেলছিয়াছ তাপমাত্রা বৃদ্ধি পায়, তেন্তে পৃথিৱীজুৰি গড়ে প্রতিগৰাকী ব্যক্তিয়ে ১৬ শতাংশ সম্পত্তি হেৰুৱাব৷ এই তথ্য পূর্বৰ সম্ভাৱনাতকৈ অধিক৷ কিয়নো পূর্বে মাত্র ১.৪ শতাংশহে হেৰুৱাব বুলি ধাৰণা কৰা হৈছিল৷ জলবায়ু পৰিৱর্তনৰ মোকাবিলাৰ লক্ষ্যৰে হ্রস্বম্যাদী আৰু দীর্ঘম্যাদী নীতি গ্রহণ কৰিলেও গোলকীয় উষ্ণতা ২.১ ডিগ্রী চেলছিয়াছ বৃদ্ধি পাব৷ এনে পৰিপ্রেক্ষিতত গোলকীয় অর্থনীতিৰ ওপৰত নেতিবাচক প্রভাৱ পৰিব৷ স্মর্তব্য যে বিশ্বৰ সর্বোচ্চ সংস্থা ৰাষ্ট্রসংঘই জলবায়ু চুক্তিৰে গোলকীয় উষ্ণতা ১.৫ ডিগ্রী চেলছিয়াছতকৈ যাতে বৃদ্ধি হ’ব নোৱাৰে তাৰ বাবে বিশ্বৰ দেশসমূহক নীতি নির্ধাৰণৰ পৰিকল্পনা কৰিছে৷ কিন্তু সেয়াও শেহতীয়া গৱেষণাত বিপৰীত ছবি প্রতিফলিত হৈছে৷ সেউজ গৃহ গেছ নির্গমন হ্রাসেৰে জলবায়ু পৰিৱর্তনৰে মোকাবিলা কৰাৰ লক্ষ্য ল’লেও ই কার্যকৰী হোৱা নাই৷ গোলকীয় উষ্ণতা বৃদ্ধি আৰু জলবায়ু পৰিৱর্তনে পৃথিৱীত অনাহূত পৰিস্থিতিৰ সৃষ্টি কৰি আছে৷ পৃথিৱীত প্রাকৃতিক দুর্যোগৰ অস্বাভাৱিক ছবি এখন ফুটি উঠিছে৷ বিশ্বজুৰি বতৰৰ অস্বাভাৱিক পৰিৱর্তনে গোলকীয় যোগান শৃংখলত ভয়াৱহ প্রভাৱ পেলাব৷ ইয়াৰ পৰিপ্রেক্ষিতত অধিকাংশ দেশেই খাদ্যকে ধৰি অত্যাৱশ্যকীয় সামগ্রীৰ ক্ষেত্রত অভাৱনীয় সমস্যাৰ সন্মুখীন হ’ব৷ অতি শীতল অঞ্চল এই বতৰৰ ফলত লাভান্বিত হোৱাৰ সম্ভাৱনাও নথকা নহয়৷ অভাৱনীয় বান, অতিমাত্রা গৰমকে ধৰি বতৰৰ অস্বাভাৱিকতাই মানুহৰ জীৱন–যাপনতো ব্যাঘাত জন্মাব৷ জলবায়ু পৰিৱর্তনৰ ভয়াৱহতাৰ প্রতি লক্ষ্য ৰাখি গৱেষকৰ দলটোৱে শীঘ্রেই জলবায়ু পৰিৱর্তনৰ প্রতি পদক্ষেপ গ্রহণ কৰিবলৈ পৰামর্শ আগবঢ়াইছে৷ অর্থনীতিৰ ওপৰত গৱেষকৰ দলটোৱে অনুমান কৰাতকৈ অধিক বিৰূপ প্রভাৱ পৰিব৷ পৃথিৱীত প্রতিগৰাকী ব্যক্তিয়েই নিজৰ সম্পত্তি হেৰুৱাই দৰিদ্র হোৱাৰ দিশে আগবাঢ়িব৷ ইয়েই পৃথিৱীত অনাহূত পৰিস্থিতিৰ সৃষ্টি কৰিব পাৰে৷ সেয়ে গোলকীয় উষ্ণতা নিয়ন্ত্রণত ৰাখিবলৈ বিশ্বৰ দেশসমূহ ঐক্যবদ্ধ হ’ব লাগিব৷ মানৱ জাতিৰ প্রয়োজনত নিজৰ স্বার্থ পৰিহাৰ কৰিব লাগিব৷ অন্যথা পৃথিৱীৰ অস্তিত্ব সংকটত পৰিব আৰু মানৱ জাতিও অস্তিত্বৰ শংকাত ভুগিব লাগিব৷ গোলকীয় উষ্ণতা নিয়ন্ত্রণেহে জলবায়ু পৰিৱর্তনৰ ভয়াৱহতাক ৰোধ কৰিব পাৰিব৷ এই কথা বিজ্ঞানী আৰু গৱেষকে বাৰম্বাৰ সকীয়াই আছে৷