নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ইৰান–আমেৰিকাৰ সংঘাত

ড’নাল্ড ট্রাম্প আমেৰিকাৰ ৰাষ্ট্রপতি পদত অধিষ্ঠিত হোৱাৰ পাছৰে পৰা মধ্য প্রাচ্যৰ পৰিস্থিতি অধিক অশান্ত হৈ পৰিছে৷ গাজাত হামাছৰ সৈতে ইজৰাইলৰ যুদ্ধবিৰতিৰ মূল কাৰিকৰ যদিও ইজিপ্ত আৰু কাটাৰক বুলি কোৱা হয়, গভীৰভাৱে বিশ্লেষণ কৰিলে আমেৰিকাৰ ভূমিকা গুৰুত্বপূর্ণ আছিল৷ আমেৰিকাৰ চাপৰ বাবেই দুমহীয়া যুদ্ধবিৰতিত হামাছ আৰু ইজৰাইলে সন্মতি প্রকাশ কৰিছিল৷ কিন্তু যুদ্ধবিৰতিৰ সময়সীমা উকলি যোৱাৰ পাছত ট্রাম্প প্রশাসনে বিষয়টোক লৈ বিশেষ চিন্তা কৰা পৰিলক্ষিত হোৱা নাই৷ ইফালে, যুদ্ধবিৰতিৰ অন্ত পৰাৰ লগে লগে গাজাত পুনৰ হিংস্র আক্রমণ আৰম্ভ কৰিছে ইজৰাইলে৷ শেহতীয়া এই আক্রমণৰ ঘটনাত এতিয়ালৈকে শিশু–মহিলাসহ সাত শতাধিক লোকে প্রাণ হেৰুৱাইছে৷ আনকি গাজাত ঈদৰ উৎসৱ চলি থকাৰ সময়তে ইজৰাইলী সেনাই চলোৱা আক্রমণত প্রায় ৭০গৰাকী লোক নিহত হয়৷ এই ঘটনাত আহত হয় শতাধিক লোক৷ এনে শিহৰণকাৰী আক্রমণৰ লগে লগে মধ্য প্রাচ্যৰ দেশসমূহে পুনৰ যুদ্ধবিৰতি চুক্তিত স্বাক্ষৰ হ’ব লাগে বুলি দাবী জনাইছে৷ আনকি ইজিপ্ত আৰু কাটাৰে আগবঢ়োৱা যুদ্ধবিৰতিৰ প্রস্তাৱৰ প্রতি বিভিন্ন ৰাষ্ট্রই সমর্থন জনাইছে৷ পেলেষ্টাইনী সশস্ত্র সংগঠন হামাছেও যুদ্ধবিৰতিৰ সময়সীমা বৃদ্ধি হ’লে বাকী থকা ইজৰাইলী পণবন্দীসকলক মুক্তি দিব বুলি ঘোষণা কৰিছে৷ কিন্তু ইজৰাইল চৰকাৰে পণবন্দীৰ মুক্তিৰ লগতে হামাছৰ আত্মসমর্পণৰ দাবী জনাইছে৷ অকল সেয়াই নহয়, পেলেষ্টাইনী লোকসকলক আশ্রয় শিবিৰৰ পৰা আঁতৰি যোৱাৰ নির্দেশো দিছে ইজৰাইলে৷ ইজৰাইলৰ এনে তৎপৰতাৰ অন্তৰালতেই আছে মার্কিন ৰাষ্ট্রপতি ড’নাল্ড ট্রাম্পৰ যুযুধান পদক্ষেপ৷ লক্ষণীয়ভাৱে ট্রাম্পে গাজা দখল কৰিব বুলি পূর্বেই ঘোষণা কৰিছে৷ পেলেষ্টাইনী লোকসকলক অন্য দেশত আশ্রয় গ্রহণ কৰিবলৈ নির্দেশ দিছে ট্রাম্পে৷ এই ঘটনাক লৈ ইতিমধ্যে মধ্য প্রাচ্যৰ দেশসমূহে প্রতিক্রিয়া প্রকাশ কৰিছে৷ আনকি ৰাষ্ট্রসংঘৰ মজিয়াতো বিষয়টোক লৈ সৃষ্টি হৈছে বিতর্ক৷
এনে এক অস্থিৰ পৰিস্থিতি চলি থকাৰ সময়তে ইৰান সমর্থিত য়েমেনৰ সশস্ত্র সংগঠন হুঠিৰ ঘাটিত আক্রমণ চলাইছে মার্কিন সেনাই৷ ইৰানৰ সমর্থনপুষ্ট সকলো সশস্ত্র সংগঠনৰ বিৰুদ্ধে বোমাবর্ষণ আৰম্ভ কৰিব বুলি হুংকাৰ দিছে ড’নাল্ড ট্রাম্পে৷ আমেৰিকাৰ সমান্তৰালকৈ ইজৰাইলে লেবাননত হিজবুল্লাৰ ঘাটিত পুনৰ সামৰিক অভিযান আৰম্ভ কৰিছে৷ যেন আৰম্ভ হ’ব ধৰা শান্তি প্রক্রিয়া ধ্বংস কৰি পুনৰ যুদ্ধৰ পথ গ্রহণ কৰিছে ইজৰাইল আৰু আমেৰিকাই৷ সমগ্র মধ্য প্রাচ্যত এনে কার্যৰ বাবে অশান্ত হৈ পৰাৰ লগে লগে ট্রাম্পে ইৰানক এইবাৰ যুদ্ধৰ ভাবুকি দিছে৷ স্মর্তব্য যে পূর্বে ইউৰোপীয় পাঁচ দেশ আৰু আমেৰিকাৰ সৈতে ইৰানে যি পাৰমাণৱিক চুক্তি স্বাক্ষৰ কৰিছিল, সেই চুক্তি ভংগ হৈছিল ট্রাম্পৰ প্রথমটো কার্যকালত৷ অর্থাৎ ট্রাম্পৰ অবিবেচকী নীতিৰ বাবেই পাৰমাণৱিক নিৰস্ত্রীকৰণৰ প্রক্রিয়া ইৰানে আৰম্ভ কৰিছিল যদিও সেয়া বন্ধ হৈ পৰে৷ এইবাৰ ইজৰাইল আৰু আমেৰিকাৰ চোৰাংচোৱাই তথ্য লাভ কৰিছে যে ইৰানে গোপনে মাটিৰ তলত গঢ়ি তুলিছে ‘মিছাইল চিটী’৷ অর্থাৎ অতি গোপনে মাটিৰ তলত বিশাল অস্ত্রভাণ্ডাৰ গঢ়ি তুলিছে ইৰানে৷ এই অস্ত্রভাণ্ডাৰত আছে দীর্ঘ দূৰত্বভেদি বহু ইউৰেনিয়াম ডিপ্লেটেড ক্ষেপণাস্ত্র৷ মধ্যপ্রাচ্যৰ আশে–পাশে থকা মার্কিন সেনাৰ যিকোনো ঘাটিত ইৰানে এই ক্ষেপণাস্ত্রৰে আক্রমণ চলাব পাৰে৷ ইতিমধ্যে ট্রাম্পে ইৰানক ভাবুকি দিছে যে পাৰমাণৱিক চুক্তিত দেশখনে শীঘ্রেই স্বাক্ষৰ নকৰিলে বোমাবর্ষণ আৰম্ভ কৰা হ’ব৷ তাৎপর্যপূর্ণভাৱে ট্রাম্পৰ এই ভাবুকিত শিৰ নত নকৰি ইৰানে প্রতিটো বোমাৰ মূল্য তেজেৰে ভৰিব লাগিব বুলি আমেৰিকাক ওলোটাই ভাবুকি দিছে৷ অকল সেয়াই নহয়, ইৰানে আমেৰিকাৰ বোমাবর্ষণৰ প্রত্যুত্তৰ দিবলৈ ইতিমধ্যে দীর্ঘ দূৰত্বভেদি ক্ষেপণাস্ত্র সাজু কৰা বুলিও হুংকাৰ দিছে৷ অর্থাৎ মার্কিন ৰাষ্ট্রপতি ট্রাম্পৰ বাবে এতিয়া মধ্যপ্রাচ্যত আৰু এখন যুদ্ধৰ আশংকা ঘনীভূত হৈ পৰিছে৷

You might also like