নিয়মীয়া বাৰ্তা ১৩ নৱেম্বৰঃ গোৱাত অনুষ্ঠিতব্য ৫২সংখ্যক ‘ভাৰতীয় আন্তঃৰাষ্ট্রীয় চলচ্চিত্র মহোৎসৱ’ৰ আন্তঃৰাষ্ট্রীয় প্রতিযোগিতা শাখালৈ নির্বাচিত ১৫খন ছবিৰ তালিকাত অন্তর্ভুক্ত হৈছে অসমৰ জনপ্রিয় অভিনেত্রী আইমী বৰুৱা পৰিচালিত তথা অভিনীত ‘ছেমখৰ’৷ বিশ্বৰ প্রায় আঢ়ৈ হাজাৰ ছবিৰ মাজৰ পৰা চলচ্চিত্র মহোৎসৱখনৰ আন্তঃৰাষ্ট্রীয় প্রতিযোগিতা শাখাৰ বাবে মুঠ ১৫খনক নির্বাচিত কৰা হৈছে৷ ইয়াৰে ডিমাচা ভাষাৰ ‘ছেমখৰ’সহ তিনিখন ভাৰতৰ ছবি৷ ফিনলেণ্ড, পাৰাগুৱে, ৰোমানিয়া, জাপান, বাংলাদেশ আদি ৰাষ্ট্রৰ ছবিৰ সৈতে অসমৰ ‘ছেমখৰ’এ সন্মানীয় চলচ্চিত্র প্রতিযোগিতাখনত অংশগ্রহণ কৰিব৷
মন কৰিবলগীয়া যে ‘ছেমখৰ’ হৈছে প্রথমগৰাকী মহিলা পৰিচালকৰ ছবি, যিয়ে সেই মহোৎসৱৰ আন্তঃৰাষ্ট্রীয় চলচ্চিত্র প্রতিযোগিতা শাখাত ভাৰতক প্রতিনিধিত্ব কৰিব৷ কেন্দ্রীয় তথ্য আৰু সম্প্রচাৰ মন্ত্রালয়ৰ অধীনস্থ চলচ্চিত্র সমাৰোহ সঞ্চালকালয়ৰ লগতে গোৱা চৰকাৰৰ উদ্যোগত অহা ২০ৰ পৰা ২৮ নৱেম্বৰলৈ ৫২সংখ্যক ভাৰতীয় আন্তঃৰাষ্ট্রীয় চলচ্চিত্র মহোৎসৱ অনুষ্ঠিত হ’ব৷ ‘ছেমখৰ’ৰ উপৰি অসমৰ আন তিনিখন ছবিয়ে ইতিপূর্বে চলচ্চিত্র মহোৎসৱখনত ইণ্ডিয়ান পেনোৰামালৈ নির্বাচিত হৈছিল৷ আন তিনিখন ছবি হ’ল–‘ফিচাৰ ফিল্ম’ শিতানত ছিজৌ (বড়ো), বোম্বা ৰাইড (মিচিং) আৰু ‘নন–ফিচাৰ ফিল্ম’ শিতানত বীৰাংগনা (অসমীয়া)৷