নিয়মীয়া বাৰ্তা ২৫ ফেব্ৰুৱাৰীঃ গুৱাহাটীৰ চানমাৰি কলনীত নির্মাণ কৰি উলিওৱা নিউ গুৱাহাটী কোষাগাৰটো ৰাজ্যৰ বিত্ত, স্বাস্থ্য, শিক্ষা, লোকনির্মাণ বিভাগৰ মন্ত্রী ড০ হিমন্ত বিশ্ব শর্মাই বুধবাৰে শুভ উদ্বোধন কৰে৷ প্রায় দুই কোটি টকাৰে এই কোষাগাৰটো নতুনকৈ নির্মাণ কৰি উলিওৱা হৈছে৷ এই অনুষ্ঠানতে সংবাদ মাধ্যমৰ আগত মন্ত্রী ড০ শর্মাই কয় যে ৰাজ্যখনৰ বিভিন্ন স্থানত বর্তমানৰ চৰকাৰে উপ–কোষাগাৰ স্থাপন কৰি আহিছে৷ অনাগত দিনত প্রতিটো বিধানসভা সমষ্টিতে একোটাকৈ উপ–কোষাগাৰ স্থাপনৰ লক্ষ্য চৰকাৰৰ আছে৷ তদুপৰি জিলা কোষাগাৰসমূহো ঠিকঠাক কৰি থকাৰ উল্লেখ কৰি তেওঁ কয় যে নতুনকৈ গঠিত জিলাতো চৰকাৰে কোষাগাৰ স্থাপনৰ বাবে অনুমোদন দিছে৷ পূর্বতকৈ বর্তমান অসমত কোষাগাৰ সেৱা বহু ভাল হোৱাৰ বিষয়ে জানিবলৈ দি তেওঁ কয় যে কোষাগাৰসমূহ ইতিমধ্যে কম্পিউটাৰ বেজ হৈছে৷ ৰিজার্ভ বেংকৰ ই–কুবেৰ ছফটৱেৰৰ সৈতেও কোষাগাৰৰ প্রত্যক্ষ সম্পর্ক স্থাপন হোৱাৰ ফলত কোষাগাৰৰ কাম মন্থন আৰু প্রণালীবদ্ধ হৈছে৷ আজিৰ এই অনুষ্ঠানত কামৰূপ (মেট্র’)ৰ উপায়ুক্ত বিশ্বজিৎ পেগুকে ধৰি বিত্ত বিভাগৰ বিষয়াবর্গ উপস্থিত থাকে৷