নিয়মীয়া বাৰ্তা, ২৫ ফেব্ৰুৱাৰীঃ অনলাইন বাণিজ্যিক প্রতিষ্ঠান আমাজনে দ্বিতীয় বিশ্বযুদ্ধত ইহুদী নিধনৰ পাশৱিকতাক লৈ ‘হাণ্টার্ছ’ শীর্ষক ১০টা খণ্ডৰ এক ধাৰাবাহিক শ্ব’ মুকলি কৰাৰ পিছতেই ইহুদী সংগঠনবোৰে কঠোৰ সমালোচনা কৰিছে৷ কেইবাটাও ইহুদী সংগঠনে হাণ্টার্ছত নাজী পাশৱিকতাৰ ছবি তথা দৃশ্যায়নক সমালোচনা কৰাৰ উপৰি আমাজনে ইহুদী বিৰোধী প্রচাৰ গ্রন্থ বিক্রীৰ অনুমতি প্রদান কৰা বিষয়টোতো ক্ষোভ উজাৰিছে৷ অৱশ্যে হাণ্টার্ছৰ প্রযোজক ডেভিদ ভেইলে আমাজন আৰু এই ধাৰাবাহিকক সুৰক্ষা প্রদান কৰিবলৈ গৈ মন্তব্য কৰিছে যে বিতর্কিত গ্রন্থবোৰ বিক্রী যুক্তিসংগত৷
স্মর্তব্য যে ১৯৭০ৰ দশকত নাজী হাণ্টাৰৰ দল এটাৰ কাহিনীক লৈ ১০টা খণ্ডৰ এই ধাৰাবাহিক হাণ্টার্ছ নির্মাণ কৰা হৈছে৷ ইয়াত মুখ্য চৰিত্রত অভিনয় কৰিছে আল–পাছিন’ৱে৷