নিয়মীয়া বাৰ্তা, ১৯ ডিচেম্বৰঃ ব্যক্তিগত ৰাজনৈতিক স্বার্থ সিদ্ধিৰ বাবে ইউক্রেইনৰ ওপৰত চাপ সৃষ্টি কৰা বিষয় লৈ আমেৰিকাত ৰাষ্ট্রপতি ড’নাল্ড ট্রাম্পৰ বিৰুদ্ধে মহাভিযোগ প্রক্রিয়া চলাই আছে ডেম’ক্রেটিক পার্টীয়ে ৷ মার্কিন হাউছ অৱ ৰিপ্রেজেণ্টেটিভত ট্রাম্পৰ বিৰুদ্ধে মহাভিযোগৰ ভোট প্রক্রিয়াৰ পূর্বে ৰাষ্ট্রপতিগৰাকীয়ে ডেম’ক্রেট নেত্রী নানচী পেল’ছিলৈ প্রেৰণ কৰিছে এখন কঠোৰ পত্র ৷
এই পত্রত ট্রাম্পে অভিযোগ কৰিছে যে নানচী পেল’ছিৰ বাবেই এতিয়া আমেৰিকা গণতন্ত্রৰ ওপৰত মুকলি যুদ্ধ চলিছে ৷ উল্লেখনীয় যে মহাভিযোগৰ ভোট প্রক্রিয়াত ট্রাম্পৰ বিপক্ষে গৰিষ্ঠসংখ্যক ডেম’ক্রেট প্রতিনিধিয়ে ভোটদান কৰাৰ সম্ভাৱনা আছে ৷ যদি ট্রাম্পৰ বিৰুদ্ধে মহাভিযোগ ভোট প্রক্রিয়া সফল হয়, তেন্তে ছিনেটত ইয়াক লৈ আৰম্ভ হ’ব বিচাৰ৷ অর্থাৎ ট্রাম্প কিয় দেশখনৰ ৰাষ্ট্রপতি হৈ থাকিব নালাগে তাক লৈ বিচাৰ প্রক্রিয়া চলিব পাৰে মহাভিযোগৰ ভোট সফল হ’লে ৷ ট্রাম্পে পেল’ছিলৈ প্রেৰণ কৰা ছয় পৃষ্ঠাৰ পত্রত উল্লেখ কৰা হৈছে যে ছিনেটত মহাভিযোগৰ যি প্রক্রিয়া চলিছে সেয়া গণতন্ত্রৰ ওপৰত আঘাত ৷