নিয়মীয়া বাৰ্তা, ১৯ এপ্ৰিলঃ মহামাৰী ক’ভিড–১৯ৰ বিৰুদ্ধে গোলকীয় যুঁজত আন দেশক সহায় কৰা বাবে ভাৰতক চেল্যুট জনাইছে ৰাষ্ট্রসংঘৰ সচিবপ্রধান এণ্টনী’ গুটেৰেছে ৷ আমেৰিকা যুক্তৰাষ্ট্রকে ধৰি বিভিন্ন দেশলৈ মেলেৰিয়া প্রতিৰোধী ঔষধ হাইড্র’ক্সিক্ল’ৰোকুইন যোগান ধৰাৰ বাবে ভাৰতক ৰাষ্ট্রসংঘৰ সচিবপ্রধানগৰাকীয়ে চেল্যুট জনোৱা বুলি এখন সংবাদ মেলত মুখপাত্র ষ্টেফান ডুজাৰিকে প্রকাশ কৰিছে ৷ ক’ভিড–১৯ক লৈ ভাৰতৰ পদক্ষেপ সন্দর্ভত সোধা প্রশ্ণৰ উত্তৰত সচিবপ্রধানগৰাকীৰ্ মুখপাত্র ডুজাৰিকে কয় যে বাণিজ্যিক ভিত্তিত হ’লেও ভাৰতে ৫৫খন ক’ৰোনা ভাইৰাছ সংক্রমিত দেশলৈ হাইড্র’ক্সিক্ল’ৰোকুইন যোগান ধৰা প্রক্রিয়া অব্যাহত ৰাখিছে৷ ক’ভিড–১৯ৰ বিৰুদ্ধে যুঁজত এই হাইড্র’ক্সিক্ল’ৰোকুইন সম্ভাব্য ঔষধ হিচাপে আমেৰিকা যুক্তৰাষ্ট্রৰ খাদ্য আৰু ঔষধ কর্তৃপক্ষই চিনাক্ত কৰাৰ পাছতেই আমেৰিকাই ভাৰতৰ পৰা এই ঔষধবিধ বিচাৰিছিল৷ ক’ৰোনা ভাইৰাছৰ বাবে এই ঔষধবিধ ৰপ্তানিত নিষেধাজ্ঞা বলৱৎ কৰাৰ পৰিপ্রেক্ষিতত আমেৰিকা যুক্তৰাষ্ট্রই ভাৰতক এই ঔষধবিধ প্রেৰণ কৰিবলৈ আহ্বান জনায়৷ আমেৰিকাৰ আহ্বানৰ প্রতি লক্ষ্য ৰাখিয়েই মেলেৰিয়া প্রতিৰোধী এই ঔষধবিধৰ ৰপ্তানিত নিষেধাজ্ঞা প্রত্যাহাৰ কৰে আৰু আমেৰিকা যুক্তৰাষ্ট্রলৈ প্রেৰণ কৰে৷ আমেৰিকাৰ পাছত মৰিছাছ চিচিলী দেশেও এই ঔষধবিধ ভাৰতৰ পৰা লাভ কৰে৷ আফগানিস্তান, ভূটান, বাংলাদেশ, নেপাল, মালদ্বীপ, শ্রীলংকা, ম্যানমাৰ, জাম্বিয়া, মাদাগাস্কাৰ, উগাণ্ডা, মালি, কংগো, আর্মেনিয়া, ফ্রান্স, জর্ডান, কেনিয়া, নাইজেৰিয়া, অ’মান, পেৰু, নিগাৰ, বুৰকিনা ফাছো, ডোমিকান ৰিপাব্লিক, ইকুৱেডৰ, কাজাখস্তান, ছিৰিয়া, জামাইকা, ইউক্রেইন আদি দেশলৈও হাইড্র’ক্সিক্ল’ৰোকুইন প্রেৰণ কৰিব নতুন দিল্লীয়ে৷ উল্লেখ্য যে হাইড্র’ক্সিক্ল’ৰোকুইন প্রেৰণ কৰাৰ বাবে আমেৰিকা যুক্তৰাষ্ট্রৰ ৰাষ্ট্রপতি ড’নাল্ড ট্রাম্পে ভাৰতৰ প্রধানমন্ত্রী নৰেন্দ্র মোদীক ধন্যবাদ জ্ঞাপন কৰিছে৷ ক’ভিড–১৯ৰ বিৰুদ্ধে ভাৰতৰ যুঁজক ইতিমধ্যে ৰাষ্ট্রসংঘৰ লগতে বিশ্ব স্বাস্থ্য সংস্থাই ভূয়সী প্রশংসা কৰিছে ৷