বিশেষ বাৰ্তা, ১২ আগষ্ট : গুজৰাটৰ চুৰাটত বেংক অৱ মহাৰাষ্ট্রৰ শাখাত দিনদুপৰতে ৫ সশস্ত্র ডকাইতে ৫ মিনিটৰ ভিতৰতে ১৪ লাখ টকা লুটি নিয়া ঘটনাই চাঞ্চল্যৰ সৃষ্টি কৰিছে৷ আৰক্ষীয়ে প্রকাশ কৰা মতে, পাঁচজন সশস্ত্র ডকাইতে দিনদুপৰতে দুখন মটৰচাইকেলত আহি বেংকৰ ভিতৰত সোমাই পাঁচ মিনিটৰ ভিতৰতে ১৪ লাখ টকা লৈ পলায়ন কৰে৷ চিচি টিভি কেমেৰাত বেংকৰ বাহিৰৰ আৰু ভিতৰৰ ডকাইতিৰ সমগ্র ঘটনা স্পষ্টকৈ ওলাই পৰাত আৰক্ষীয়ে ফুটেজৰ পৰা ডকাইতক চিনাক্তকৰণৰ প্রক্রিয়া আৰম্ভ কৰিছে৷ পুৱা প্রায় ১১ বজাতেই সশস্ত্র ডকাইতকেইটাই বেংকৰ ভিতৰত প্রৱেশ কৰি পিষ্টল দেখুৱাই ধনখিনি লুটি নিবলৈ সক্ষম হয়৷ লক্ষণীয় যে বেংকৰ ভিতৰত গ্রাহককো পিষ্টল দেখুৱাই ধমক দিয়ে ডকাইতকেইটাই৷ ডকাইতকেইটাৰ এই কার্যত বেংক কর্মচাৰী আৰু গ্রাহক হতবাক হৈ পৰে৷