জামাইকাৰ ভাৰতীয় বংশোদ্ভৱ টনী–এন সিঙৰ শিৰত মিছ ৱর্ল্ড–২০১৯ খিতাপ

নিয়মীয়া বাৰ্তা, ১৬ ডিচেম্বৰঃ ২০১৯ চনৰ মিছ ৱর্ল্ড খিতাপ লাভ কৰিছে জামাইকাৰ ভাৰতীয় বংশোদ্ভৱ টনী–এন সিঙে ৷ শনিবাৰে নিশা লণ্ডনত অনুষ্ঠিত সৌন্দর্য প্রতিযোগিতাৰ চূড়ান্ত ৰাউণ্ডত ২৩ বছৰীয়া জামাইকাৰ সুন্দৰীগৰাকীয়ে শেষ হাঁহি মাৰিবলৈ সক্ষম হয় ৷ জামাইকাৰ মৰাণ্ট বেত জন্মগ্রহণ কৰা টনী–এন সিঙৰ পৰিয়াল তেওঁৰ ৯ বছৰ বয়সতে আমেৰিকালৈ আহি ফ্ল’ৰিডাত থিতাপি লয় ৷

ফ্ল’ৰিডা ষ্টেট ইউনিভাৰছিটীৰ পৰা ৱ’মেন ষ্টাডিজ এণ্ড চাইক’লজী বিষয়ত স্নাতক ডিগ্রী লাভ কৰা সিঙে ভৱিষ্যতে এগৰাকী চিকিৎসক হ’ব বিচাৰে ৷ উল্লেখ্য যে টনী–এন সিঙৰ মাতৃ জামাইকাৰ হ’লেও তেওঁৰ পিতৃ ব্রেডশ্ব’ সিং ভাৰতীয় মূলৰ ৷ ইফালে, ৬৯সংখ্যক মিছ ইণ্ডিয়াৰ দ্বিতীয় ৰানাৰ আপ হয় ৰাজস্থানৰ উদয়পুৰৰ ফেমিনা মিছ ইণ্ডিয়া ২১ বছৰীয়া সুমন ৰাও ৷

মুম্বাইৰ ইউনিভাৰছিটীৰ একাউটেঞ্চীৰ ছাত্রী সুমন ৰাও এগৰাকী কথক নৃত্যশিল্পীও ৷ সৌন্দর্য প্রতিযোগিতাৰ প্রথম ৰানাৰ আপ হয় ফ্রান্সৰ অ’পহেলি মেজিনো ৷