নিয়মীয়া বাৰ্তা, ১২জুনঃ পাকিস্তানৰ প্রাক্তন প্রধানমন্ত্রী নৱাজ শ্বৰীফৰ ভাতৃ তথা পি এম এল–এনৰ মুৰব্বী তথা নেচনেল এছেম্বলীৰ বিৰোধী নেতা শ্বেহবাজ শ্বৰীফ ক’ভিড–১৯ৰ দ্বাৰা সংক্রমিত হৈছে৷ ক’ভিড–১৯ বা ক’ৰোনা ভাইৰাছ মহামাৰীৰ দ্বাৰা নেতাগৰাকী সংক্রমিত হোৱাৰ লগে লগে নিজাববীয়াকৈ হোম কোৱাৰেণ্টাইনত থাকিবলৈ লৈছে৷ দলটোৰ মুখপাত্র মৰিয়ম ঔৰংজেৱে আজি সংবাদ–পত্র ‘ডন’ক এই কথা জনাইছে৷ মুখপাত্রগৰাকীয়ে সংবাদ–পত্রখনক জনোৱা অনুসৰি শ্বৰীফ কর্কট ৰোগতো আক্রান্ত হৈ আছে৷ দলৰ আন এগৰাকী নেতা আতাউল্লা টাৰাৰে উল্লেখ কৰিছে যে নেচনেল একাউণ্টেবিলিটী ব্যুৰ’ (এনএবি)লৈ বাৰে বাৰে শ্বৰীফৰ শাৰীৰিক অৱস্থা সন্দর্ভত জনোৱা হৈছে যদিও উন্নত চিকিৎসা প্রদান কৰা হোৱা নাই৷ গতিকে শ্বেহবাজ শ্বৰীফৰ ক্ষেত্রত অকল্পনীয় কিবা ঘটিলেই তাৰ বাবে প্রধানমন্ত্রী ইমৰান খান আৰু এন এ বি জগৰীয়া হ’ব বুলি আতাউল্লা টাৰাৰে ঘোষণা কৰিছে৷ স্মর্তব্য যে প্রাক্তন প্রধানমন্ত্রী আব্বাছিও ক’ভিড–১৯ত আক্রান্ত হৈছে