নিয়মীয়া বাৰ্তা, ১৯ ডিচেম্বৰঃ ভাৰতীয় মূলৰ ব্রিটিছ মন্ত্রী আলোক শর্মা আৰু কোষাগাৰ বিভাগৰ মুখ্য সচিব ঋষি ছুনাকে মঙলবাৰে সংসদত ভাগৱত গীতা লৈ শপতগ্রহণ কৰে ৷ ব্রিটিছ হাউছ অৱ কমন্সত ভাগৱত গীতা লৈ দুয়োগৰাকী সাংসদে শপতগ্রহণ কৰি দেশখনৰ ৰাজনীতিত ভাৰতীয় মূলৰ নেতাৰ প্রভাৱেই নহয়, ভাৰতীয় সংস্কৃতিৰ আধিপত্য বিস্তাৰ হোৱা ঘটনাক প্রতিপন্ন কৰিছে ৷
আগ্রাত জন্মগ্রহণ কৰা ৫২ বছৰীয়া আলোক শর্মা চতুর্থবাৰৰ বাবে সংসদলৈ নির্বাচিত হৈছে ৷ ৰিডিং ৱেষ্টৰ পৰা শর্মা নির্বাচিত হোৱাৰ বিপৰীতে ইনফ’ছিছৰ প্রতিষ্ঠাতা এন আৰ নাৰায়ণ মূর্তিৰ জোঁৱাই ৩৯ বছৰীয়া ছুনাক তৃতীয়বাৰৰ বাবে নির্বাচিত হৈছে য়র্কশ্বায়াৰৰ ৰিছমণ্ড সমষ্টিৰ পৰা ৷
স্মর্তব্য যে ব্রিটেইনৰ ৰাণী কুইন এলিজাবেথ দ্বিতীয় আৰু ৰাজপৰিয়ালৰ সদস্যসকলৰ সন্মুখত দেশখনৰ আইন অনুসৰি সাংসদৰ দায়িত্ব নিষ্ঠাৰে পালন কৰিব বুলি দয়োগৰাকী ৰাজনীতিকে শপতগ্রহণ কৰিছে ৷