নিয়মীয়া বাৰ্তা, ১৫ এপ্ৰিলঃ লকডাউনৰ ম্যাদ বৃদ্ধি কৰি সমগ্ৰ বিশ্বতে চলিছে ক’ৰোনা সংক্ৰমণ ৰোধৰ বাবে ব্যাপক তৎপৰতা । ভাৰতত ইতিমধ্য দ্বিতীয় পৰ্যায়ৰ লকডাউন আগন্তুক ৩ মে পৰ্যন্ত বৃদ্ধি কৰা হৈছে । অৱশ্যে লকডাউন বৃদ্ধিৰ এই সময়তে এক নতুন খবৰ আহিছে হাভাৰ্ড বিশ্ববিদ্যালয়ৰ পৰা ।
বিশ্ববিদ্যালয়খনৰ গৱেষকসকলে কৈছে যে ক’ৰোনা মোকাবিলা কৰিবৰ বাবে সমগ্ৰ বিশ্বত ২০২২ চনলৈকে প্ৰয়োজন হ’ব পাৰে সামাজিক দূৰত্বৰ । এতিয়াই যদি সামাজিক দূৰত্ব বজায় ৰখাৰ ক্ষেত্ৰত থকা নিয়ম উঠাই দিয়া হয় তেন্তে আৰু বেছি সময়ৰ প্ৰয়োজন হ’ব পাৰে পৃথিৱীক । মঙলবাৰে প্ৰকাশিত এক গৱেষণা পত্ৰত উল্লেখ কৰা হৈছে এই কথা ।
বৰ্তমান যিদৰে সামাজিক দূৰত্ব বজাই ৰখা হৈছে সেইয়া যথেষ্ট নহয় । বিশ্বৰ বহু বিশেষজ্ঞই এই সময়ছোৱাত যিদৰে ক’ৰোনা প্ৰতিৰোধী কাম হৈছে সেইদৰে সম্পূৰ্ণৰূপে ক’ৰোনাক পৰাভূত কৰিব পৰা নহ’ব বুলিও উল্লেখ কৰিছে । বিভিন্ন সময়ত ই পুনৰ ইনফ্লুয়েঞ্জাৰ দৰে আকৌ আহিব বুলিও কৈছে বিশেষজ্ঞ সকলে ।
হাভাৰ্ড বিশ্ববিদ্যালয়ৰ টি এইচ চেন স্কুল অৱ পাব্লিক হেলথে বিভিন্ন পৰিসংখ্যাৰ ভিত্তিত বহু বছৰৰ বাবে গঢ়ি তুলিছে এক মডেল । গৱেষণাত কোৱা হৈছে যে , তেওঁলোকৰ এই মডেলটো তৈয়াৰ কৰা হৈছে ক’ভিড-১৯ ওপৰত সম্পূৰ্ণৰূপে নজৰ ৰাখিবৰ বাবে । ক’ভিডক পৰাভূত কৰাৰ বাবে বিশ্বৰ বিভিন্ন অঞ্চলৰ ডাটা সংগ্ৰহ কৰাও প্ৰয়োজন বুলি কোৱা হৈছে গৱেষণা পত্ৰত ।