নিয়মীয়া বাৰ্তা, ৩০ মাৰ্চঃ সমগ্ৰ বিশ্বত ক’ৰোনাৰ সন্ত্ৰাস অব্যাহত থকাৰ সময়তে নিজকে এই মহামাৰীৰ পৰা ৰক্ষা কৰিবলৈ সকলো লোকেই পালন কৰিছে ছেল্ফ আইছুলেচন । থাইলেণ্ডৰ ৰজা ভাজিৰালংকৰ্ণেও এতিয়া ক’ৰোনাৰ ভয়াৱহতাৰ পৰা বাচিবলৈ আছে ছেল্ফ আইছুলেচনত ।
পিছে এইগৰাকী ৰজাৰ ছেল্ফ আইছুলেচনৰ বিষয়টোৱে যেন আমোদ দিছে সকলোকে । জামাৰ্নীৰ এখন বিলাসী হোটেলত আইছ’লেট হৈ থকা ৰজা গৰাকীয়ে লগত নিছে ২০ গৰাকী বিশেষ মহিলা সেৱিকা ।
জাৰ্মান কাকত বিল্ডত প্ৰকাশিত খবৰ অনুযায়ী ২০ গৰাকী মহিলা সেৱিকাৰ উপৰিও ৰজাৰ লগত আছে কেইজনমান কৰ্মচাৰীৰ লগতে দেহৰক্ষী । ৬৭ বছৰীয়া থাইলেণ্ডৰ এইগৰাকী ৰজাৰ চাৰিগৰাকীকৈ ৰাণী আছে যদিও ছেল্ফ আইছুলেচনৰ এই সময়ত তেওঁলোক লগত আছে নে নাই সেইটো জানিব পৰা হোৱা নাই ।
থাইলেণ্ডত ক’ৰোনা আক্ৰান্তৰ সংখ্যা বৃদ্ধি পাই থকাৰ সমান্তৰালভাৱে প্ৰজাৰ প্ৰতি কোনো দায়িত্ব নথকা এইগৰাকী ৰজাই নিজকে ৰক্ষা কৰিবলৈ জাৰ্মানীৰ হোটেলত থকা বিষয়টোৱে বিশেষ চৰ্চা লাভ কৰিছে । ছ’চিয়েল মিডিয়াত হাজাৰ হাজাৰ লোকে এতিয়া সমালোচনা কৰিছে ৰজা ভাজিৰালংকৰ্ণক ।