২১ বছৰ পাছত তেলৰ মূল্য সর্বনিম্ন আমেৰিকাত

নিয়মীয়া বাৰ্তা, ২১ এপ্রিলঃ ক’ৰোনা ভাইৰাছ মহামাৰীয়ে বিশ্বৰ বিভিন্ন দেশত আর্থিক সংকট সৃষ্টি কৰাৰ লগতে আমেৰিকাতো ইয়াৰ প্রতিকূল প্রভাৱ পৰা পৰিলক্ষিত হৈছে৷ দেশখনত ২১ বছৰৰ পাছত ভয়াৱহভাৱে হ্রাস পাইছে তেলৰ মূল্য৷ ১৯৯৯ৰ পাছত তেলৰ চাহিদা হ্রাস পাইছে বিশ্বৰ ভিতৰতে আটাইতকৈ বেছি তেল খৰচ হোৱা দেশখনত৷ আমেৰিকাৰ তেলৰ বজাৰৰ বেঞ্চমার্ক হিচাপে চিহ্ণিত ৱেষ্ট টেক্সাছ ইণ্টাৰ মিডিয়েট (ডব্লিউটিআই)ৰ তৰফৰ পৰা সদৰী কৰা তথ্য অনুসৰি তেলৰ দাম প্রতি বেৰেলত ১৪ শতাংশ অর্থাৎ ১৫.৬৫ ডলাৰ হ্রাস পাইছে৷ এয়া দেশখনৰ অর্থনীতিলৈ এক অশনি সংকেত হিচাপে চিহ্ণিত হৈছে৷ ১৯৯৯ চনৰ পাছত তেলৰ বজাৰত এতিয়া আৰম্ভ হৈছে বৃহৎ মন্দা৷ তৈল উদ্যোগবোৰলৈ নামি আহিছে এক অনিশ্চয়তা৷ ভৱিষ্যৎ দিনলৈ ক’ৰোনা মহামাৰীৰ এই সংকট অব্যাহত থাকিলে সমগ্র আমেৰিকাত তেলৰ মূল্য অধিক হ্রাস পাব৷ অকল সেয়াই নহয়, বিশ্বৰ তেলৰ বজাৰলৈ নামি আহিব মন্দা অৱস্থা৷ গতিকে ক’ৰোনা মহামাৰীৰ সংকটে এতিয়া বিশ্বৰ তেলৰ বজাৰখনত সৃষ্টি কৰিছে নতুন আশংকা৷ স্মর্তব্য যে তেলৰ বজাৰত চলি থকা এই মন্দা অৱস্থাৰ বাবেই বিশ্বৰ বিভিন্ন দেশে অপেকক তেলৰ মূল্য নির্ধাৰণৰ ক্ষেত্রত নতুন প্রস্তাৱ আগবঢ়াইছে৷ কিন্তু আমেৰিকাকে ধৰি কেইবাখনো দেশে ইয়াক মানি লোৱা নাই৷ পৰিণতিত বিশ্বজুৰি আহি পৰা সংকটৰ সন্মুখীন হৈছে আমেৰিকা আৰু ইউৰোপৰ সমৃদ্ধিশালী দেশবোৰ ৷