নিয়মীয়া বাৰ্তা ডিজিটেল, ২ জানুৱাৰীঃ আমেৰিকাৰ নিউ অৰলিন্সত সংঘটিত হোৱা হৃদয়বিদাৰক ঘটনাৰ পিছত পুনৰ সংঘটিত হৈছে আন এক আক্ৰমণ। এইবাৰ নিউয়ৰ্কৰ এটা নাইট ক্লাবত আক্ৰমণকাৰীয়ে ১১ জন লোকক গুলীয়াই হত্যা কৰিছে। amny.comৰ বাতৰি অনুসৰি কুইন্সৰ আমুজ্জুৰা নাইট ক্লাবত সংঘটিত হৈছে এই গুলীচালনা। ১ জানুৱাৰীৰ নিশা প্ৰায় ১১:৪৫ বজাত আমজুৰা ইভেণ্ট হলৰ সমীপত সংঘটিত হৈছিল এই গুলীচালনা। গুলীচালনাত আহত লোকসকলক স্থানীয় চিকিৎসালয়লৈ প্ৰেৰণ কৰা হৈছে, য’ত চিকিৎসাধীন হৈ আছে। ঘটনাৰ পিছতে এন ৱাই পি ডিৰ ইউনিটসমূহে ইভেণ্ট হলৰ ওচৰত সমবেত হৈ ঘটনাস্থলীৰ তদন্ত আৰম্ভ কৰিছে। চিটিজেন এপৰ প্ৰতিবেদন অনুসৰি গুলীচালনাৰ লগত জড়িত দুজন সন্দেহযুক্ত লোক এতিয়াও পলাতক অৱস্থাত আছে। গুলীচালনাৰ পিছতে হুলস্থুলীয়া পৰিৱেশৰ সৃষ্টি হয়। জামাইকা লং আইলেণ্ড ৰেল ৰোড ষ্টেচনৰ পৰা কেইটামান ব্লক দূৰত আমেজুৰা ইভেণ্ট হল। য’ত নিশা প্ৰায় ১১:৪৫ বজাত দ্ৰুত গুলীৰ শব্দ শুনা গ’ল, তাৰ পিছত আতংকৰ সৃষ্টি হয়। এই সময়ছোৱাত একাংশ লোকো গুৰুতৰভাৱে আঘাতপ্ৰাপ্ত হয়। নিউয়ৰ্ক আৰক্ষী বিভাগ (এন ৱাই পি ডি) তৎক্ষণাত পৰিস্থিতি চম্ভালিবলৈ সেই স্থানত উপস্থিত হয় আৰু শ্বাট দলো মোতায়েন কৰা হয়। নিৰাপত্তাৰ কাৰণে চাৰিওফালৰ পথ বন্ধ কৰি দিয়ে। অৱশ্যে এতিয়ালৈকে কোনো সন্দেহযুক্ত লোকক চিনাক্ত কৰিব পৰা নাই কৰ্তৃপক্ষই। নিউয়ৰ্ক চহৰৰ অগ্নিনিৰ্বাপক বাহিনী আৰু অন্যান্য স্থানীয় সংস্থাৰ এটা দলে সেই স্থানত উপস্থিত হৈ ভুক্তভোগীক সহায় কৰি আছে। ইয়াৰ উপৰি আৰক্ষীয়ে ওচৰৰ ঘৰবোৰত তালাচী চলাই আছে আৰু চিচিটিভিৰ ফুটেজ পৰীক্ষা কৰি ঘটনা সন্দৰ্ভত অধিক তথ্য সংগ্ৰহ কৰি আছে। নৱবৰ্ষৰ দিনা নিউ অৰলিন্সৰ মধ্য অঞ্চলত এখন বাহনে ভিৰৰ মাজত এখন গাড়ীৰ খুন্দাত ১৫জন লোকৰ মৃত্যু হোৱাৰ লগতে ৩০জনতকৈ অধিক লোক আহত হয়। এনবিচি নিউজে প্ৰকাশ কৰা অনুসৰি ৪২ বছৰীয়া ছামছুদ দীন জব্বাৰ নামৰ সন্দেহজনক লোকজনক আৰক্ষীয়ে গুলীয়াই হত্যা কৰে।