🔹 নাই পানী, নাই খাদ্য !
নিউজ ডেস্ক, ৪ এপ্রিল : লণ্ডনৰ পৰা মুম্বাইলৈ আহি আছিল ভার্জিন আটলাণ্টিকা নামৰ উৰণ সংস্থাটোৰ এখন বিমান৷ এই বিমানখনত আছিল দুই শতাধিক ভাৰতীয় যাত্রী৷ মাজ আকাশত এগৰাকী যাত্রী হঠাতে অসুস্থ হৈ পৰে৷ চিকিৎসাৰ বাবে বিমানখন জৰুৰী অৱতৰণ কৰোৱা হয় তুৰস্কৰ এটা বিমানবন্দৰত৷ তাৰ পিছত কেইবাঘণ্টাও অতিক্রম কৰে যদিও বিমানখনে তুৰস্ক বিমানবন্দৰৰ পৰা মুম্বাই অভিমুখে যাত্রা আৰম্ভ কৰা নাছিল৷ যাত্রীসকলে দাবী কৰা অনুসৰি, ১৮ ঘণ্টা উকলি যোৱাৰ পিছতো এই বিমানবন্দৰতে তেওঁলোক আবদ্ধ হৈ থাকে৷ কিন্তু যাত্রীসকলক কোনোধৰণৰ খাদ্য বা খোৱাপানী দিয়া হোৱা নাই৷ সংবাদ মাধ্যমৰ সূত্রই সদৰী কৰা অনুসৰি, জৰুৰী অৱতৰণৰ সময়ত বিমানখনত যান্ত্রিক ত্রুটিয়ে দেখা দিয়ে৷ অকল সেয়াই নহয়, তুৰস্কৰ যিটো বিমানবন্দৰত বিমানখন অৱতৰণ কৰোৱা হৈছে, তাত বিমান পৰিচালনা কৰাৰ উপযুক্ত পৰিৱেশ নাই৷ সংবাদ মাধ্যমৰ সৈতে বার্তালাপৰ সময়ত এগৰাকী ব্যক্তিয়ে উল্লেখ কৰে যে ১৮ ঘণ্টা বিমানবন্দৰতেই কটোৱা হয় যদিও বিমানবন্দৰ বা উৰণ সংস্থাৰ কোনো লোকৰ সৈতে যোগাযোগ কৰিব পৰা নাই৷ যিটো টার্মিনেলত যাত্রীসকল থাকে, তাত খাদ্য আৰু খোৱাপানী নাছিল বুলিও প্রকাশ পাইছে৷