🔹 অসামৰিক লোকৰ বসতি অঞ্চলত আক্রমণ
নিউজ ডেস্ক, ৫ এপ্রিল : সীমান্তৰ গাজা ভূখণ্ডৰ কিছু অঞ্চল দখল কৰি তাত নতুন কৰিড’ৰ নির্মাণ কৰাৰ কথা ঘোষণা কৰিছে ইজৰাইলে৷ সেইবাবে গাজাত প্রবল আক্রমণ চলোৱা হ’ব বুলি ঘোষণা কৰিছিল ইজৰাইলী সেনাই৷ সেই ঘোষণাৰ ২৪ ঘণ্টাৰ ভিতৰতে গাজাত পুনৰ ৰক্তক্ষৰণ ঘটালে ইজৰাইলী সেনাই৷ ২৪ ঘণ্টাত ইজৰাইলৰ আক্রমণত নিহত হৈছে ৫৫জন পেলেষ্টাইনী৷ গাজা ষ্ট্রীপৰ দক্ষিণ প্রান্তৰ খান ইউনিছ চহৰৰ নাছেৰ হাস্পতালত কালি কেইবাজনৰো মৃতদেহ দেখিবলৈ পোৱা গৈছে৷ নিহতসকলৰ ভিতৰত আছে কেইবাটাও শিশু৷ এই শিশুসকলৰ বয়স ১ৰ পৰা ৭ বছৰৰ ভিতৰত৷ লক্ষণীয় যে ইজৰাইলী সেনাৰ বোমাবর্ষণত এই লোকসকল নিহত হৈছে৷ হাস্পতালৰ সূত্রই দাবী কৰা অনুসৰি, নিহত লোকসকলৰ আটাইকেইগৰাকীয়েই অসামৰিক৷ অর্থাৎ অসামৰিক লোকৰ বসতি অঞ্চলত বোমাবর্ষণ কৰিছে ইজৰাইলী সেনাই৷ এই বোমাবর্ষণৰ ঘটনা ইজৰাইলে স্বীকাৰ কৰিছে যদিও হামাছৰ ঘাটিক লক্ষ্য কৰি আক্রমণ চলোৱা হৈছিল বুলি ঘোষণা কৰিছে৷