টি-২০ৰ পিছত এদিনীয়া শৃংখলাতো নিউজিলেণ্ডৰে লজ্জাৰ পৰাজয় পাকিস্তানৰ, দুবাৰকৈ হোৱাইট ৱাশ্বৰ সন্মুখীন
নিউজ ডেস্ক, ৫ এপ্ৰিলঃ এদিনীয়া শৃংখলাত নিউজিলেণ্ডে পাকিস্তানক হোৱাইট ৱাশ্ব কৰিছে। তৃতীয় এদিনীয়াখনত কিৱি দলটোৱে পাকিস্তানক ৪৩ ৰানত পৰাস্ত কৰে। বৰষুণৰ বাবে এই মেচখন ৪২ অভাৰ খেলা হয়। প্ৰথমে বেটিং কৰাৰ পিছত নিউজিলেণ্ডে ৪২ অভাৰত ৮ উইকেটত ২৬৪ ৰান সংগ্ৰহ কৰে। ইয়াৰ উত্তৰত পাকিস্তানৰ দলটোৱে ৪০ অভাৰত ২২১ ৰান সংগ্ৰহ কৰি পৰাস্ত হয়। পাকিস্তানৰ হৈ সৰ্বাধিক ৫০ ৰান সংগ্ৰহ কৰে বাবৰ আজমে। তেওঁৰ বেটৰ পৰা আহে ৪টা চাৰি আৰু এটা ছয়।
প্ৰথমখন এদিনীয়াত নিউজিলেণ্ডে পাকিস্তানক ৭৩ ৰানত পৰাস্ত কৰে। ইয়াৰ পাছত দ্বিতীয়খন এদিনীয়াত কিৱি দলটোৱে ৮৪ ৰানেৰে জয়লাভ কৰে। ইফালে আজি তৃতীয় এদিনীয়াতো নিউজিলেণ্ডে পাকিস্তানক ৪৩ ৰানত পৰাস্ত কৰে। এইদৰে কিৱি দলটোৱে এদিনীয়া শৃংখলাত পাকিস্তানক হোৱাইট ৱাশ্ব কৰে।
নিউজিলেণ্ডে ৰাইছ মাৰিউৰ ৫৮ ৰান আৰু অধিনায়ক মাইকেল ব্ৰেচৱেলৰ ৫৯ ৰানৰ সহায়ত ৪২ অভাৰত ৮ উইকেটত ২৬৪ ৰান সংগ্ৰহ কৰে। পাকিস্তানৰ হৈ যুৱ বাওঁহাতৰ বেগী বলাৰ আকিব জাভেদে ৮ অভাৰত ৬২ ৰানত ৪ উইকেট দখল কৰে। নছীম শ্বাহে লাভ কৰিলে দুটা সফলতা। ইয়াৰ পাছতে পাকিস্তানৰ হৈ বাবৰ আজমে অৰ্ধশতক অৰ্জন কৰে। আব্দুল্লা শ্বাফিকে ৩৩ ৰান, মহম্মদ ৰিজৱানে ৩৭ ৰান আৰু টায়াব তাহিৰে ৩৩ ৰান সংগ্ৰহ কৰে।
নিউজিলেণ্ডৰ হৈ বেন ছিয়াৰ্ছে মাৰাত্মক বলিং কৰে। ছিয়াৰ্ছে ৯ অভাৰত মাত্ৰ ৩৪ ৰানত ৫ উইকেট দখল কৰে। ইয়াৰ বাহিৰেও জেকব ডাফীয়ে দুটা উইকেট দখল কৰে। মহম্মদ আব্বাছ, ডেৰিল মিচেল আৰু মাইকেল ব্ৰেকছৱেলে এটাকৈ সফলতা লাভ কৰে।
ইফালে এদিনীয়া শৃংখলাত পাকিস্তানক হোৱাইট ৱাশ্ব কৰাৰ পূৰ্বে কিৱি দলটোৱে টি-২০ শৃংখলাত পাকিস্তানক ৪-১ৰ ব্যৱধানত পৰাস্ত কৰিছিল। যদিও টি-২০ শৃংখলাত পাক দলত বহু নতুন খেলুৱৈ আছিল, তথাপিও এদিনীয়া শৃংখলাত বাবৰ আজম, মহম্মদ ৰিজৱানৰ দৰে জ্যেষ্ঠ খেলুৱৈ আছিল। ইয়াৰ পিছতো তিনিখন খেলৰ শৃংখলাত পাকিস্তান দলটোৱে এখনো মেচত জয়ী হ’ব নোৱাৰিলে।