নিউজ ডেস্ক, ১২ মার্চঃ পাকিস্তানৰ পৰা বালুচিস্তানক স্বাধীনৰ লক্ষ্য লোৱা বেলুচিস্তান লিবাৰেচন আর্মী, চমুকৈ বিএলএই দেশখনত যাত্রীবাহী ৰে’লৰ ওপৰত ভয়াৱহ আক্রমণ চলাইছে৷ যাত্রীবাহী ৰে’ল অপহৰণ কৰি ৰে’লখনত থকা শতাধিক যাত্রীক পণবন্দী কৰি ৰাখিছে বিএলএই৷ পাকিস্তানৰ দক্ষিণ–পশ্চিম প্রান্তৰ বেলুচিস্তান প্রদেশৰ কুৱেটাৰ পৰা খাইবাৰ পাখটুনখোৱাৰ পেছাৱৰগামী জাফৰ এক্সপ্রেছত বেলুচিস্তান লিবাৰেচন আর্মীয়ে ভয়াৱহ আক্রমণ চলায়৷ বিদ্রোহী সংগঠনটোৰ সদস্যই জাফৰ এক্সপ্রেছৰ ড্রাইভাৰক গুলী কৰি আহত কৰাৰ পাছত ৰে’লখন নিজৰ নিয়ন্ত্রণলৈ আনে আৰু ৰে’লখন নিয়ন্ত্রণ কৰিবলৈ বিএলএৰ সদস্যই ৰে’লৰ ট্রেক উৰুৱাই দি ৰে’লখন ৰাখে৷ ইয়াৰ পাছতেই ৰে’লখনৰ ৯টা দবাত থকা প্রায় ৪০০ যাত্রীক পণবন্দী কৰি লয় বিদ্রোহী সংগঠনটোৱে৷ ৰে’লখনত আক্রমণ চলাই বিদ্রোহী সংগঠনটোৱে ৬জন পাক সেনাকো গুলীয়াই হত্যা কৰে৷ ৰে’লৰ চালকসহ ১১জনৰ মৃত্যু ঘটিছে বিদ্রোহী সংগঠনটোৰ আক্রমণত৷ সূত্র মতে, শতাধিক পাক সেনাসহ ৰে’লৰ যাত্রীক পণবন্দী কৰি ৰাখি বিএলএই পাকিস্তান চৰকাৰক কঠোৰ সকীয়নি দিছে৷ যদি ৰে’লৰ পণবন্দীক মুকলি কৰিবলৈ পাক সেনাই সামৰিক অভিযান চলায় তেতিয়াহ’লে বিদ্রোহী সংগঠনটোৱেও সমুচিত প্রত্যুত্তৰ দিব৷ বিএলএৰ মুখপাত্র জিয়ান্দ বেলুচে প্রকাশ কৰা বিবৃতিত সকীয়নি দি কয় যে যদি পাকিস্তানী সেনাই অভিযান আৰম্ভ কৰে, তেতিয়াহ’লে আটাইবোৰ পণবন্দীকে হত্যা কৰা হ’ব৷ সংবাদ মাধ্যমত চর্চিত বাতৰি মতে, পাক সেনাই চলোৱা আক্রমণৰ ফলত বিদ্রোহী সংগঠনটোৱেও আক্রমণ চলাইছে৷ দুয়োপক্ষৰ মাজত প্রচণ্ড গুলীয়াগুলী হৈছে৷ আনকি এই সংঘর্ষত ৰে’লৰ দবাত জুয়ো লাগিছে৷ বিএলএই ৰে’ল অপহৰণ কৰি যাত্রীক পণবন্দী কৰাৰ পাছতেই বেলুচিস্তান চৰকাৰে জৰুৰী অৱস্থা ঘোষণা কৰিছে আৰু পৰিস্থিতিৰ সৈতে মোকাবিলা কৰিবলৈ সকলো ব্যৱস্থা গ্রহণ কৰিছে৷ পাকিস্তানী সেনাৰ ওপৰত বিগত বছৰ ধৰি আক্রমণ চলাই থকা বেলুচিস্তান লিবাৰেচন আর্মীয়ে ৰে’ল আক্রমণ কৰি ৰে’ল অপহৰণ কৰাৰ লগতে যাত্রীক পণবন্দী কৰা ঘটনাই বিশ্বজুৰি চাঞ্চল্যৰ সৃষ্টি কৰিছে৷ বিএলএৰ পাকিস্তান চৰকাৰৰ ওপৰত এয়া সবাতোকৈ ভয়াৱহ আক্রমণ৷ ৰে’ল অপহৰণ আৰু যাত্রীক পণবন্দী কৰা বিএলএৰ এই ঘটনাক কঠোৰ ভাষাৰে গৰিহণা জনাইছে দেশখনৰ মন্ত্রী নাকভিয়ে৷ চৰকাৰী সূত্রত প্রকাশ পোৱা মতে, ৰে’লখনৰ চালক, নিৰাপত্তাৰ দায়িত্বত থকা সেনাসহ ১০জন লোকৰ এতিয়ালৈকে মৃত্যু ঘটিছে৷