🔹 গুলীবিদ্ধ হোৱা সত্ত্বেও পলাই আহিল এজন
নিউজ ডেস্ক, ৯ অক্টোবৰ : জম্মু–কাশ্মীৰ বিধানসভা নির্বাচনৰ ফলাফল ঘোষণা হোৱাৰ পাছতে অনন্তনাগত দুই সেনা জোৱানক অপহৰণ কৰে সন্ত্রাসবাদীয়ে৷ এই দুয়োজন জোৱানৰ এজনে সন্ত্রাসবাদীৰ জিম্মাৰ পৰা পলায়ন কৰিবলৈ সক্ষম হয় যদিও আনজনক নৃশংসভাৱে হত্যা কৰা হয়৷ আজি নিহত এই জোৱানজনৰ দেহ উদ্ধাৰ হৈছে অৰণ্যৰ পৰা৷ গুলীৰে থকাসৰকা কৰা হৈছে জোৱানজনৰ দেহ৷ কাশ্মীৰ আৰক্ষী সূত্রই সদৰী কৰা অনুসৰি, আজি অনন্তনাগৰ পথৰিবল অৰণ্যৰ পৰা জোৱান হিলাল আহমেদ ভাটৰ দেহ উদ্ধাৰ কৰা হৈছে৷ উল্লেখনীয় যে দুয়োগৰাকী জোৱানক সন্ত্রাসবাদীয়ে অপহৰণ কৰিছিল৷ ভাৰতীয় সেনাৰ ১৬১ ইউনিটৰ এই জোৱান দুজনক কালি নিশা অপহৰণ কৰিছিল সন্ত্রাসবাদীয়ে৷ কালি সন্ত্রাস দমন অভিযানত অংশগ্রহণ কৰিছিল দুয়োজন জোৱানে৷ নিশালৈকে অনন্তনাগৰ অৰণ্যত অভিযান চলাই আছিল সেনা আৰু আৰক্ষীয়ে৷ সেই সময়তে সন্ত্রাসবাদীয়ে অপহৰণ কৰে দুয়োজন জোৱানক৷ আজি পুৱাৰ ভাগত সেনা–আৰক্ষীয়ে এই অপহৰণৰ খবৰ নিশ্চিত কৰে৷ ইয়াৰ পাছতে অভিযান তীব্রতৰ কৰে সেনা–আৰক্ষীয়ে৷ সেই সময়তে এজন জোৱানে ভৰিত দুটা গুলী লগা সত্ত্বেও সন্ত্রাসবাদীৰ জিম্মাৰ পৰা পলায়ন কৰি আহে৷ কিন্তু অন্য জোৱানজনক ইতিমধ্যে সন্ত্রাসবাদীয়ে গুলীয়াই হত্যা কৰে৷