নিয়মীয়া বাৰ্তা ১৫ মাৰ্চঃ ফ্রান্সৰ ব্যংগ আলোচনী ‘চার্লি এব্ডো’ত ব্রিটিছ ৰাজকুমাৰ হেৰী, তেওঁৰ পত্নী মেগান মার্কেল আৰু ৰাণী এলিজাবেথৰ কার্টুন প্রকাশ পাইছে৷ ফৰাচী এই ব্যংগ আলোচনীখনত ব্রিটিছ ৰাণী এলিজাবেথে মেগান মার্কেলৰ কান্ধত বহি থকা দেখুওৱা হৈছে৷ উল্লেখনীয় যে জর্জ ফ্লয়ডক আমেৰিকান আৰক্ষীয়ে যেনেধৰণে আঁঠুৰে ডিঙি হেঁচি হত্যা কৰিছিল, অনুৰূপভাৱে ব্রিটিছ ৰাণী মেগান মার্কেলক আতিশয্য চলোৱা দেখুওৱা হৈছে কার্টুনটোত৷
উল্লেখনীয় ডাচেছ অৱ ছাছেক্স মেগান আৰু তেওঁৰ স্বামী ৰাজকুমাৰ হেৰীয়ে কিছুদিন পূর্বে অপ্ৰা উইনফ্রীৰ সৈতে হোৱা এক সাক্ষাৎকাৰত ব্রিটিছ ৰাজপৰিয়ালত বর্ণ বৈষম্যৰ অভিযোগ আনিছিল৷ আনকি মেগান মার্কেলে ৰাজ পৰিয়ালত ইমানেই অস্বস্তিত ভুগিছিল যে তেওঁ আত্মহত্যাৰ কথা চিন্তা কৰিছিল বুলিও সাক্ষাৎকাৰটোত উল্লেখ কৰিছিল৷ ইয়াৰ পিছতে সমগ্র ব্রিটেইনত সৃষ্টি হয় চাঞ্চল্য৷ শেহতীয়াকৈ চার্লি এব্ডোৱে ইয়াক লৈ কার্টুন প্রকাশ কৰা ঘটনাই পুনৰ চাঞ্চল্যৰ সৃষ্টি কৰিছে৷