🔹 ট্রাম্পৰ ‘শুল্ক বোমা’ৰ প্রত্যুত্তৰ জিনপিঙৰ
নিউজ ডেস্ক, ৫ এপ্রিল : মার্কিন ৰাষ্ট্রপতি ড’নাল্ড ট্রাম্পৰ ‘শুল্ক বোমা’ৰ এইবাৰ প্রত্যুত্তৰ দিলে চীনৰ ৰাষ্ট্রপতি ঝি জিনপিঙে৷ আমেৰিকাৰ পৰা আমদানি কৰা পণ্যৰ ওপৰত অতিৰিক্ত ৩৪ শতাংশ শুল্ক আৰোপ কৰিলে চীনে৷ আগন্তুক দহ এপ্রিলৰ পৰা এই নতুন শুল্ক কার্যকৰী হ’ব৷ চীনৰ সংবাদ পত্র গ্লোবেল টাইমছৰ প্রতিবেদন অনুসৰি, আমেৰিকাত উৎপাদিত বিভিন্ন পণ্যৰ ওপৰত চীনত আমদানিৰ সময়ত অতিৰিক্ত ৩৪ শতাংশ শুল্ক বঢ়াই লোৱা হ’ব৷ বর্তমান যি শুল্কৰ হাৰ চলি আছে, তাৰ ওপৰত ভিত্তি কৰি বর্ধিত শুল্ক নির্ধাৰণ কৰা হৈছে৷ চীনৰ ষ্টেট কাউঞ্চিলৰ কাষ্টম টাৰিফ কমিছনে এই কথা ঘোষণা কৰিছে৷ বুধবাৰে আমেৰিকাই চীনা পণ্যৰ ওপৰত যি অতিৰিক্ত শুল্ক আৰোপ কৰিছিল, তাৰ প্রত্যুত্তৰ হিচাপে বেইজিঙে এই নতুন শুল্ক আৰোপ কৰিছে৷ স্মর্তব্য যে ট্রাম্পে চীনৰ পণ্যৰ ওপৰত অতিৰিক্ত ৩৪ শতাংশ শুল্ক আৰোপ কৰিছিল৷ লগে লগে বেইজিং প্রশাসনে অনুৰূপ পদক্ষেপ গ্রহণ কৰা হ’ব বুলি ঘোষণা কৰিছিল৷ এই ঘোষণাৰ ১ দিন পিছতে চীনেও আমেৰিকাৰ পণ্যৰ ওপৰত ৩৪ শতাংশ, অর্থাৎ সমপৰিমাণৰ শুল্ক আৰোপ কৰিছে৷ চীনৰ এই তাৎক্ষণিক পদক্ষেপক লৈ আমেৰিকাই কোনোধৰণৰ প্রতিক্রিয়া প্রকাশ কৰা নাই যদিও বিভিন্ন দেশে চীনৰ দৰে আমেৰিকাৰ পণ্যৰ ওপৰত কৰ আৰোপ কৰাৰ সিদ্ধান্ত গ্রহণ কৰিব পাৰে৷ চীনে অকল শুল্ক আৰোপেই নহয়, ট্রাম্পৰ সিদ্ধান্তৰ প্রত্যুত্তৰত বিভিন্ন চীনা সামগ্রীৰ ৰপ্তানি আমেৰিকালৈ বন্ধ কৰিছে৷ চীনৰ বাণিজ্য মন্ত্রালয়ে ঘোষণা কৰা অনুসৰি, সাতবিধ খনিজ উপাদানৰ ৰপ্তানি নিয়ন্ত্রণৰ সিদ্ধান্ত গ্রহণ কৰিছে জিনপিঙে৷ ইফালে, ‘অবিশ্বস্ত’ বুলি অভিহিত কৰি আমেৰিকাৰ এঘাৰটা সংস্থাৰ বাণিজ্য বন্ধ কৰি দিয়াৰ সিদ্ধান্ত লৈছে চীনে৷ অর্থাৎ কোনো চীনা সংস্থাৰ সৈতে আমেৰিকাৰ এই এঘাৰটা সংস্থাই কোনোধৰণৰ বাণিজ্যিক সম্পর্ক চলাই থাকিব নোৱাৰিব বুলি স্পষ্ট কৰি দিয়া হৈছে৷