বিশেষ বাৰ্তা, ১০ জুনঃ কেন্দ্ৰীয় গৃহ মন্ত্ৰালয়ে প্ৰকাশ কৰা অনুসৰি কেন্দ্ৰই ৰাজ্যপালৰ নেতৃত্বত মণিপুৰত এখন সমিতি গঠন কৰি বিভিন্ন জাতি-জনগোষ্ঠীৰ মাজত শান্তি নিৰ্মাণ প্ৰক্ৰিয়া সুচল কৰি তোলাৰ লগতে সংঘাতপূৰ্ণ পক্ষৰ মাজত আলোচনাৰ সূচনা কৰিছে। শান্তি সমিতিৰ সদস্যসকলৰ ভিতৰত মুখ্যমন্ত্রী, দুই-এজন মন্ত্রী, সাংসদ, বিধায়ক, বিভিন্ন ৰাজনৈতিক দলৰ নেতা আৰু নাগৰিক সমাজৰ নেতা আছে বুলি জানিবলৈ দিয়ে ৷ “ভাৰত চৰকাৰে মণিপুৰৰ ৰাজ্যপালৰ অধ্যক্ষতাত মণিপুৰত ‘শান্তি সমিতি’ গঠন কৰিছে। সমিতিৰ সদস্যসকলৰ ভিতৰত মুখ্যমন্ত্ৰী, ৰাজ্য চৰকাৰৰ দুই-এজন মন্ত্ৰী, সাংসদ, বিধায়ক আৰু বিভিন্ন ৰাজনৈতিক দলৰ নেতা আদিও আছে।”- গৃহ মন্ত্ৰালয়ৰ এক বিবৃতিত প্ৰকাশ। ৰাজ্যখনৰ বিভিন্ন জাতি-জনগোষ্ঠীৰ মাজত শান্তি নিৰ্মাণ প্ৰক্ৰিয়া সুচল কৰা, সংঘাতপূৰ্ণ পক্ষ-গোষ্ঠীৰ মাজত শান্তিপূৰ্ণ আলোচনা আৰু আলোচনাৰ সূচনা কৰা এই সমিতিৰ দায়িত্ব হ’ব বুলি জানিবলৈ দিয়ে। এই সমিতিখনে সামাজিক সংহতি, পাৰস্পৰিক বুজাবুজি শক্তিশালী কৰাৰ লগতে বিভিন্ন জাতি-জনগোষ্ঠীৰ মাজত আন্তৰিক যোগাযোগৰ সুবিধা প্ৰদান কৰিব বুলি বিবৃতিটোত উল্লেখ কৰা হৈছে। ইয়াৰ লগতে প্ৰাক্তন চৰকাৰী কৰ্মচাৰী, শিক্ষাবিদ, সাহিত্যিক, শিল্পী, সমাজকৰ্মী আৰু বিভিন্ন জাতি-জনগোষ্ঠীৰ প্ৰতিনিধিও অন্তৰ্ভুক্ত বুলি গৃহ মন্ত্ৰালয়ে জানিবলৈ দিয়ে। উল্লেখ্য যে কেন্দ্ৰীয় গৃহমন্ত্ৰী অমিত শ্বাহে ২৯ মে’ৰ পৰা ১ জুনলৈ মণিপুৰ ভ্ৰমণ কৰিছিল আৰু পৰিস্থিতিৰ বুজ লৈ শান্তি সমিতি গঠনৰ কথা ঘোষণা কৰিছিল।