নিয়মীয়া বাৰ্তা ডিজিটেল, ২৮ অক্টোবৰঃ ফুটবল হৈছে সমগ্ৰ বিশ্বতে আটাইতকৈ বেছি ভাল লগা খেল। এই খেল বিশ্বৰ প্ৰায়বোৰ দেশতে খেলা হয়। ফুটবলৰ কিংবদন্তি ক্রিষ্টিয়ানো ৰোনাল্ডোক লৈ বিশ্বই পাগল৷ এতিয়া আগবাঢ়ি আহিছে পৰ্তুগীজ ফুটবলাৰগৰাকীৰ এজন ডাই হাৰ্ড অনুৰাগী, যিয়ে নিজৰ অনুকৰণীয় ব্যক্তিক লগ কৰিবলৈ ৭ মাহত চাইকেলেৰে ১৩ হাজাৰ কিলোমিটাৰ যাত্ৰা কৰিছিল। যুৱকজন হৈছে চীন দেশৰ গং। ৰোনাল্ডোৰ ২৪ বছৰীয়া অনুৰাগী গঙে চাইকেলেৰে চীনৰ পৰা চৌদি আৰবলৈ যাত্ৰা কৰিছিল। ৰনাল্ডোক লগ পোৱাৰ হেঁপাহে গঙক ইমান দীঘলীয়া দূৰত্ব চাইকেল চলাবলৈ বাধ্য কৰাইছিল। প্ৰায় ৭ মাহত এই যাত্ৰা সম্পূৰ্ণ কৰিলে অনুৰাগীগৰাকীয়ে। খবৰ অনুসৰি, অনুৰাগীগৰাকীয়ে ১৮ মাৰ্চৰ পৰা যাত্ৰা আৰম্ভ কৰিছিল আৰু ২০ অক্টোবৰত আল নাছৰ ফুটবল ক্লাবৰ সন্মুখত ক্রিষ্টিয়ানো ৰোনাল্ডোক লগ পাইছিল। খবৰ অনুসৰি, অনুৰাগীগৰাকীয়ে ৰোনাল্ডোক লগ পাবলৈ ১৩০০০ কিলোমিটাৰ যাত্ৰাত মুঠ ৬খন দেশ অতিক্ৰম কৰিছিল। যাত্ৰাকালত গঙে সকলো ধৰণৰ অসুবিধাৰ সন্মুখীন হৈছিল। বিভিন্ন দেশৰ ভাষাৰ বাবে তেওঁ অসুবিধাৰ সন্মুখীন হৈছিল। ইয়াৰ বাহিৰেও খাদ্যৰ বৰ্ধিত আৰু কমি অহা দামেও গঙক বহুত বিপদত পেলাইছিল যদিও হাৰ নামানি চাইকেলেৰে যাত্ৰা সম্পূৰ্ণ কৰিলে। খবৰ অনুসৰি আগষ্ট মাহত আমেৰিকা ভ্ৰমণৰ সময়ত গং অসুস্থ হৈ পৰিছিল। অৱশ্যে চিকিৎসালয়ত বিনামূলীয়া চিকিৎসা লাভ কৰে। গঙে চাইকেলেৰে এই যাত্ৰাৰ প্ৰেৰণা লাভ কৰিছিল যেতিয়া ৰোনাল্ডোৱে ফেব্ৰুৱাৰী মাহত আঘাতৰ বাবে চীন ভ্ৰমণ বাতিল কৰিছিল। মন কৰিবলগীয়া যে ১০ অক্টোবৰত গং ৰিয়াধত উপস্থিত হৈছিল যদিও ৰোনাল্ডক লগ কৰিবলৈ তেওঁ কেইদিনমান অপেক্ষা কৰিবলগীয়া হৈছিল। আল নাছৰৰ কৰ্মচাৰীয়ে গঙক ৰোনাল্ডোক লগ পোৱাৰ ব্যৱস্থা কৰিছিল। অৱশেষত গঙে ৰোনাল্ডোক লগ পায় আৰু তেওঁৰ জাৰ্চিৰ অটোগ্ৰাফ ল’লে। এই সাক্ষাৎকাৰৰ পিছত গঙক বৰ সুখী যেন লাগিল। ইয়াৰ পূৰ্বে গঙে ৰ’নাল্ডক লাইভত বিনামূলীয়াকৈ চোৱাৰ সুযোগ পাইছিল। আন এজন অনুৰাগীয়ে গঙক বিনামূলীয়া টিকট দিছিল।