🔹 দুখীয়া পৰিয়ালৰ সন্তানৰ জীৱন সংগ্রামক লৈ চাঞ্চল্য
নিউজ ডেস্ক, ৫ এপ্রিল : কাম কৰে আচবাব–পত্রৰ দোকানত৷ মাহিলি দৰমহা হিচাপে সামান্য ধন লাভ কৰে৷ প্রতিদিনৰ খৰচ মিলাবলৈ গৈ চহৰৰ ক’তো ভাৰাঘৰ লৈ থাকিবৰ সামর্থ্য নাই তৰুণীৰ৷ চহৰত কোনো পৰিচিত আত্মীয়ও নাই তৰুণীজনীৰ৷ দোকানৰ গৰাকীৰ সৈতে কথা পাতি বাথৰুমৰ ৬ বর্গমিটাৰ স্থানত দিন কটাইছে ১৮ বছৰীয়া তৰুণীয়ে৷ শৌচালয় তথা স্নানাগাৰত দিন যাপনৰ ভিডিঅ’ ছ’চিয়েল মিডিয়াত পোষ্ট কৰিছে তৰুণীজনীয়ে৷ এই ঘটনাক লৈ ছ’চিয়েল মিডিয়াত সৃষ্টি হৈছে ধুমুহা৷ ঘটনাটো ঘটিছে চীনৰ ঝুঝু চহৰত৷ ছ’চিয়েল মিডিয়াত তৰুণীজনী মিছ য়াং নামেৰে পৰিচিত৷ গাঁৱৰ এক দৰিদ্র পৰিয়ালত তৰুণীজনীৰ জন্ম৷ গাঁৱৰ পৰা কাম বিচাৰি আহিছে ঝুঝুলৈ৷ মাহিলি ভাৰতীয় টকাৰ হিচাপত ৩১,৭৭৬ টকা দৰমহা লাভ কৰে৷ কিন্তু চহৰখনত স্বচ্ছলভাৱে জীৱন যাপন কৰিবলৈ গড় উপার্জন ৮৮,২৬৬ টকা লাগে৷ চহৰত ঘৰ ভাৰা লৈ থাকিবলৈ গ’লে মাহিলি খৰচ হয় ৯,০০০ৰ পৰা ২১,০০০ টকা৷ কিন্তু এই খৰচ বহন কৰা তৰুণীজনীৰ বাবে সম্ভৱ নহয়৷ সেইবাবে গৰাকীৰ সৈতে কথা পাতি যৌথভাৱে থকা বাথৰুম আৰু শৌচালয়ত থকাৰ সিদ্ধান্ত লয় তৰুণীজনীয়ে৷ প্রতিদিনে কাম শেষ কৰি এই বাথৰুমত জিৰণি লয় তৰুণীজনীয়ে৷ ইয়াৰ বাবে মাহত তৰুণীজনীয়ে দোকানৰ গৰাকীক আদায় দিবলগীয়া হয় ভাৰতীয় মুদ্রাৰ হিচাপত ৫৮৮ টকা৷ দোকান খোলাৰ সময়ত গ্রাহকসকলে যাতে তৰুণীজনীৰ কাপোৰ–কানিৰ বাবে অসুবিধাৰ সন্মুখীন নহয়, সেই দিশটোতো গুৰুত্ব দিবলগীয়া হয়৷ মিছ য়াঙৰ পোষ্ট ছ’চিয়েল মিডিয়াত ভাইৰেল হোৱাৰ লগে লগে তৰুণীজনীৰ কঠোৰ পৰিশ্রম আৰু জীৱন যুদ্ধক প্রশংসা কৰিছে বহুতে৷ এনে কঠোৰ পৰিশ্রম কৰা তৰুণীসকলে অধিক সা–সুবিধা পাব লাগে বুলি ছ’চিয়েল মিডিয়াত বিভিন্নজনে মন্তব্য কৰিছে৷ বিভিন্নজনে আকৌ এনে ঘটনাক লৈ দুখ প্রকাশ কৰিছে৷ বিশেষকৈ চীনৰ দৰে দেশত এই ঘটনা লজ্জাজনক বুলিও অভিহিত কৰিছে বিভিন্নজনে৷